హోమ్

లేటేస్ట్ న్యూస్

యంగ్ రెబెల్ స్టార్ ప్రభాస్ - కన్నడ స్టైలిష్ డైరెక్టర్ ప్రశాంత్ నీల్ కలయికలో రాబోతున్న చిత్రం 'సలార్'. పుల్ లెంగ్త్ యాక్షన్ ఎంటర్‌టైనర్‌గా రూపొందుతోన్న ఈ సినిమా షూటింగ్ కొద్ది రోజుల క్రితం సింగరేణి బొగ్గు గనుల్లో ప్రారంభం అయింది. అక్కడ హీరో ఇంట్రడక్షన్ సీన్‌తో పాటు ఓ భారీ యాక్షన్ సీక్వెన్‌ను తెరకెక్కించారు. పాన్ ఇండియా రేంజ్‌లో వస్తున్న ఈ సినిమా సెకెండ్ షెడ్యూల్ కరోనా ప్రభావం కారణంగా ఆగిపోయింది. ఈ నేపథ్యంలో సినిమాకు సంబంధించిన మిగిలిన పనులను చేస్తున్నాడు దర్శకుడు. ఇందులో భాగంగానే మరో భామను ఇందులోకి దింపుతున్నాడట.

ప్రభాస్ నటిస్తోన్న 'సలార్'లో ఓ స్పెషల్ సాంగ్ ఉంటుందని చాలా రోజులుగా వార్తలు వస్తూనే ఉన్నాయి. అందుకు తగ్గట్లుగానే ఇందులో బాలీవుడ్ హీరోయిన్ నటిస్తుందని జోరుగా ప్రచారం జరుగుతోంది. ఈ క్రమంలోనే ఎంతో మంది స్టార్ హీరోయిన్ల పేర్లు తెరపైకి వచ్చాయి. అయితే, తాజా సమాచారం ప్రకారం.. ఈ సాంగ్ కోసం కన్నడ భామ 'కేజీఎఫ్' హీరోయిన్ శ్రీనిధి శెట్టిని తీసుకుంటున్నారని తెలిసింది. ఇప్పటికే ఆమె దీనికి గ్రీన్ సిగ్నల్ కూడా ఇచ్చేసినట్లు ప్రచారం జరుగుతోంది. ఆమె రాకతో ఈ యాక్షన్ సినిమాకు అదనపు గ్లామర్ వచ్చి చేరినట్లైంది.

ఇక, 'సలార్'లోని ఈ స్పెషల్ సాంగ్ షూటింగ్ వచ్చే నెల ఆరంభంలో జరుగుతుందట. దీనికి ప్రముఖ కన్నడ మ్యూజిక్ డైరెక్టర్ రవి బస్రూర్ అదిరిపోయే ట్యూన్స్ రెడీ చేసినట్లు తెలిసింది. అందుకు తగ్గట్లుగానే ఇందులో స్టెప్పులు కూడా అదుర్స్ అనిపించేలా డిజైన్ చేయబోతున్నారట. ఇదిలా ఉండగా.. ఈ ప్రతిష్టాత్మక చిత్రాన్ని హొంబళే ప్రొడక్షన్స్ బ్యానర్‌పై విజయ్ కిరగందుర్ నిర్మిస్తున్నారు. శృతి హాసన్ ఇందులో హీరోయిన్. ఇందులో ప్రభాస్ రెండు విభిన్నమైన లుక్‌లతో కనిపిస్తాడని కొద్ది రోజులుగా ప్రచారం జరుగుతోంది. 2022 ఏప్రిల్ 14న ఇది ప్రేక్షకుల ముందుకు రాబోతుంది.