వాల్మీకి x గ్యాంగ్‌లీడర్: వివాదానికి చెక్.. ఊపిరి పీల్చుకొన్న నాని, వరుణ్ తేజ్

వాల్మీకి, గ్యాంగ్ లీడర్ క్లాష్

సెప్టెంబర్ 13 తేదీన వాల్మికీ, గ్యాంగ్ లీడర్ రిలీజ్ చేయాలని గతంలో నిర్ణయం జరిగింది. సాహో రిలీజ్ డేట్ మారడం వల్ల ఈ సమస్య ఏర్పడింది. ఒకే రోజు రెండు సినిమాలు క్లాష్ కావడం కొంత కష్టంగా అనిపించింది. సాహో వల్ల ఇలాంటి పరిస్థితి ఏర్పడింది. వెంటనే అక్టోబర్ 2వ తేదీన సైరా రిలీజ్ డేట్ కూడా ఉండటంతో చేసేదేమీ లేక అదే డేట్‌ రెండు చిత్రాల విడుదలకు పోటీ ఏర్పడింది అని నిర్మాత దిల్ రాజు తెలిపారు.

నిర్మాతలకు నష్టమని

ఇలా వాల్మీకి, గ్యాంగ్ లీడర్ సినిమాలు ఒకే రోజున పోటీ పడటం వల్ల నిర్మాతలకు నష్టం వాటిల్లే పరిస్థితి కనిపించింది. అందుచేత ప్రొడ్యూసర్స్ గిల్డ్‌లో ఉన్న నిర్మాతలిద్దరం కలిసి చర్చించుకొన్నాం. గ్యాంగ్ లీడర్ సెప్టెంబర్ 13వ రోజున, వాల్మీకి చిత్రాన్ని సెప్టెంబర్ 20 తేదీన రిలీజ్ చేయాలని నిర్ణయం తీసుకొన్నాం అని దిల్ రాజు అన్నారు. ఇలాంటి సమస్యను పరిష్కరించిన 14 రీల్స్‌‌కు థ్యాంక్స్ తెలియజేస్తున్నామన్నారు.

పండగ సీజన్ల ఒకే

సాధారణంగా హాలీడేస్ సమయంలో రెండు సినిమాలు వస్తే ఎలాంటి సమస్యలు ఉండవు. ఎందుకంటే సెలవుల్లో రెండు సినిమాలు వచ్చిన ప్రేక్షకాదరణ ఉంటుంది. కానీ సెలవు లేని సమయంలో రెండు సినిమాలు పోటీ పడితే ఎవరో ఒకరికి నష్టం వాటిల్లుతుంది. అందుకే ఈ నిర్ణయం తీసుకొన్నాం. భవిష్యత్‌లో కూడా ఇలాంటి సమస్యలను నివారించాలన్న అభిప్రాయం వ్యక్తమైంది. ఈ సందర్భంగా సానుకూలంగా స్పందించిన 14 రిల్స్‌కు వాల్మీకి దర్శకుడు హరీష్ శంకర్, హీరో వరుణ్ తేజ్ థ్యాంక్స్ చెప్పారు అని దిల్ రాజు తెలియజేశారు.

సైరా, సాహో మూవీస్‌ను

సాహో 350 కోట్ల రూపాయల భారీ బడ్జెట్‌తో దేశవ్యాప్తంగా రిలీజ్ అవుతున్నది. కాబట్టి ఆ సినిమాను గౌరవించాలని ప్రొడ్యూసర్ గిల్డ్ భావించింది. అలాగే సైరా మూవీది కూడా అదే పరిస్థితి. భారీ బడ్జెట్‌తో రూపొందిన సైరా ప్యాన్ ఇండియా మూవీగా మారింది. కాబట్టి వాటికి ఉన్న ప్రాధాన్యతను బట్టి మేము మా డేట్స్‌ను మార్చుకొన్నాం అని దిల్ రాజు ఓ ప్రశ్నకు సమాధానం ఇచ్చారు. పండగల సమయంలో సినిమాలకు మినహాయింపు ఉంటుందన్నారు.