7500 మందికి మిడిల్ క్లాస్ ఫండ్‌.. విజయ్ దేవరకొండ ఫౌండేషన్ టార్గెట్ రీచ్

కరోనా కారణంగా ప్రపంచవ్యాప్తంగా కోట్లమంది ప్రజలు ఇబ్బందులుపడుతున్న విషయం తెలిసిందే. భారతదేశంలోనూ కరోనా కేసులు రోజురోజుకీ పెరిగిపోతున్నాయి. ప్రభుత్వం ఈ వైరస్ కట్టడికి అన్ని విధాలుగా ప్రయత్నిస్తూనే ఉంది. కార్పొరేట్ సంస్థలు, ఎన్జీఓస్, పారిశ్రామికవేత్తలు, సినిమా సెలబ్రిటీలు డొనేషన్ల రూపంలో భారీ మొత్తాలు విరాళంగా అందించారు. ముఖ్యమంత్రి మరియు ప్రధానమంత్రి రిలీఫ్ ఫండ్ కు ఆ మొత్తాలు అందాయి. అలాగే.. ఇండస్ట్రీ బాగోగుల కోసం సీసీసీ ట్రస్ట్ ఉంది. దానికి హీరో విజయ్ దేవరకొండ 5 లక్షలు విరాళం ఇవ్వటమే కాకుండా ఒకడుగు ముందుకేసి మిడిల్ క్లాస్ ఫండ్ పేరుతో అవసరార్థులకు రేషన్ అందజేసే కార్యక్రమాన్ని తన భుజాలపై వేసుకున్నాడు.

అటు ప్రభుత్వ పథకాలు అందుకోలేక.. ఇటు తమకు తాముగా బ్రతకలేక బాధపడేవారి కోసం విజయ్ ఈ మిడిల్ క్లాస్ ఫండ్ ను ప్రారంభించాడు. చాలా ఛాలెంజెస్ ఉన్నప్పటికీ విజయ్ సేవా దృక్పధంతో ఈ రిస్క్ తీసుకున్నాడు. డబ్బు సేకరించడం, అవసరార్థులను గుర్తించడం, వారికి సేవలు అందేలా చేయడం అనేది చాలా పెద్ద పని. పాతిక లక్షల మొత్తంతో 2500 కుటుంబాలకు సహాయపడాలని తపనతో విజయ్ ఈ మిడిల్ క్లాస్ ఫండ్‌ను ప్రారంభించాడు.

అయితే.. దేవరకొండ ఫౌండేషన్ కు 50 లక్షల రూపాయల విరాళాలు వచ్చాయి. దాంతో ఏకంగా 7500 కుటుంబాలకు సహాయపడ్డారు. ఇప్పటికీ వేలల్లో అప్లికేషన్స్ వస్తూనే ఉన్నాయి. ఇప్పటికే 70,000 అప్లికేషన్స్ పెండింగ్‌లో ఉన్నాయి. అందువల్ల విజయ్ ఈ మిడిల్ క్లాస్ ఫండ్ సేవలను ప్రస్తుతానికి నిలిపివేశారు. ఎప్పటికప్పుడు తన సోషల్ మీడియా ఎకౌంట్స్ ద్వారా డొనేషన్స్ రూపేణా ఎంత వచ్చింది, ఎంత ఖర్చయింది, ఎంత మొత్తం అవసరార్థులకు వినియోగించారు.

ఎన్ని అప్లికేషన్స్ వచ్చాయనే వివరాలను ఏ రోజుకు ఆ రోజు వెల్లడిస్తూ పారదర్శకతను విజయ దేవరకొండ ఫౌండేషన్ పాటించింది. కేవలం 2500 కుటుంబాలకు సహాయం చేద్దామని విజయ్ ప్రారంభించిన ఈ మిడిల్ క్లాస్ ఫండ్ తో ఇప్పటికీ 7500 కుటుంబాలకు సహాయం అందించడం జరిగింది. అయితే.. ఇంకా 70,000 మంది అవసరార్థులున్నారు. వాళ్ళందరికీ సహాయం అందించాలంటే 7 కోట్ల రూపాయలు కావాలి. ఇప్పటి వరకు వచ్చిన అప్లికేషన్స్‌ను వ్యాలిడేట్ చేసి, వారికి సహాయం అందించడానికి దేవరకొండ ఫౌండేషన్ సభ్యులు ప్రయత్నిస్తూనే ఉన్నారు. రానున్న కాలంలో దేవరకొండ ఫౌండేషన్ ద్వారా లక్ష మందికి ఉద్యోగ కల్పన దిశగా అడుగులు వేయడం జరుగుతున్నది.