సిల్వ‌ర్ స్క్రీన్ స‌రికొత్త మంత్రం- బాస్‌.. గుండు బాస్‌

క‌రోనా స‌మ‌యంలో ఎవ‌రూ ఊహించని విధంగా మెగాస్టార్ చిరంజీవి గుండు లుక్‌ను త‌న సోష‌ల్ మీడియాలో పోస్ట్ చేశారు.  ఆ లుక్ చూసి ఫ్యాన్స్‌, ప్రేక్ష‌కులు ఆశ్చ‌ర్య‌పోయారు. భోళా శంక‌ర్ సినిమా కోసం చిరు లుక్ టెస్ట్ చేసుకున్నార‌నే టాక్ వినిపించింది. మ‌రి సినిమా ఆగ‌స్ట్ 11న రిలీజ్ అవుతుంది. మ‌రి మెగాస్టార్ గుండుతో అభిమానుల‌ను ఆక‌ట్టుకుంటారో.. లేక  గుండు లుక్ కేవ‌లం టెస్ట్‌కే ప‌రిమితం అవుతుందా? అని చూడాలి మ‌రి. 

బాలీవుడ్ కింగ్ ఖాన్‌.. షారూఖ్ లేటెస్ట్ భారీ బ‌డ్జెట్ మూవీ జ‌వాన్‌. ఈ సినిమా ట్రైల‌ర్‌ను రీసెంట్‌గా ప్రివ్యూ పేరుతో విడుద‌ల చేసిన సంగ‌తి తెలిసిందే. అందులో చివ‌రి నిమిషంలో ఆయ‌న గుండుతో క‌నిపించ‌టంతో అంద‌రూ వావ్ అనుకున్నారు. మ‌రి సినిమాలో షారూక్ గుండుతో ఎంతో సేపు క‌నిపిస్తారో  చూడాలి. సౌత్ డైరెక్ట‌ర్ అట్లీ ఈ సినిమాను తెర‌కెక్కిస్తున్నారు. సెప్టెంబ‌ర్ 7న ఈ సినిమా రిలీజ్ కానుంది. 

నార్త్ ఆడియెన్స్‌కు సుపరిచితులైన సౌత్ హీరోల్లో ధ‌నుష్ ఒక‌రు. ఇప్పుడు త‌ను 50వ సినిమాను చేస్తున్నారు. ఓ వైపు డిఫ‌రెంట్ సినిమాలు చేసుకుంటూ వైవిధ్య‌మైన పాత్ర‌ల‌తో మెప్పించ‌టం త‌న‌కు తెలిసినంత‌గా ఈ తరం హీరోల్లో మ‌రెవ‌రికీ తెలియ‌ద‌నే చెప్పాలి. ధ‌నుష్ త‌న 50వ మూవీలో హీరోగా న‌టిస్తూ ద‌ర్శ‌క‌త్వం వ‌హిస్తున్నారు. ఈ సినిమాలో ఆయ‌న గుండుతో క‌నిపించ‌నున్నారు. ఇటీవ‌ల తిరుమ‌ల వెళ్లి మ‌రీ గుండు చేయించుకున్నారు ధ‌నుష్‌. ఆ గుండు లుక్ నెట్టింట తెగ వైర‌ల్ అయ్యింది. 

సూప‌ర్ స్టార్ రజినీకాంత్ శివాజీ సినిమాలో ఎవ‌రూ ఊహించ‌ని విధంగా గుండు లుక్‌తో స‌ర్‌ప్రైజ్ ఇచ్చారు. క్లైమాక్స్ ఫైట్ అంతా గుండుతోనే ఉంటుంది. త‌లైవాను స‌రికొత్త లుక్‌లో చూపించి అభిమానుల‌కు షాకిచ్చారు డైరెక్ట‌ర్ శంక‌ర్‌. 

ఇక గ‌జినీ సినిమా కోసం సూర్య‌, సేతు కోసం చియాన్ విక్ర‌మ్ గుండుతో క‌నిపించారు. సేతు రీమేక్‌గా వ‌చ్చిన శేషు మూవీలో రాజ‌శేఖ‌ర్ కూడా గుండుతోనే క‌నిపించారు. అలాగే ఇదే చిత్రాన్ని బాలీవుడ్‌లో రీమేక్ చేయ‌గా, స‌ల్మాన్ ఖాన్ ఆ పాత్ర కోసం గుండు లుక్‌తో మెప్పించారు. ఇక గజినీ హిందీ రీమేక్‌లో న‌టించిన ఆమిర్ ఖాన్ కూడా గుండులో క‌నిపించారు. కాష్మోరా సినిమాలో కార్తి, నిజం సినిమాలో గోపీచంద్ ఇలా మ‌న స్టార్స్ అంద‌రూ ఇది వ‌రకే గుండు లుక్స్‌తో ఆక‌ట్టుకున్నవారే.