థియేటర్లో ఒకే ఒక్కడు: రూ. 1000, రూ. 500 నోట్ల ఎఫెక్ట్!

By Bojja Kumar

Published: Saturday, November 12, 2016, 16:02 [IST]

హైదరాబాద్: రూ. 1000, రూ. 500 నోట్ల రద్దు ఎఫెక్ట్ సినిమా పరిశ్రమపై భారీగానే పడింది. కేంద్ర ప్రభుత్వం ఈ ప్రకటన చేసినప్పటి నుండి థియేటర్లలో పెద్ద నోట్లను తీసుకోవడం లేదు. దీంతో థియేటర్లకు వచ్చే ప్రేక్షకుల సంఖ్య భారీగా పడిపోయింది.

అహ్మదాబాద్ లో ఓ థియేటర్లో..... ఒకే ఒక్క ప్రేక్షకుడితో షో నడిపంచాల్సి వచ్చింది. పెద్ద నోట్ల రద్దు ఎఫెక్ట్ ఏ రేంజిలో ఉందో చెప్పడానికి ఇదొక ఉదాహరణ. చాలా చోట్ల ఏటీఎంలు కూడా పనిచేయక పోవడం, చేతిలో రోజువారి ఖర్చులకు కూడా డబ్బులు లేక పెద్దనోట్ల మార్పడి కోసం బ్యాంకుల వద్ద బారులు తీరుతున్నారు.

సింగిల్ గా థియేటర్లో సినిమా చూసే అవకాశం దక్కించుకున్న ఆ యువకుడి పేరు హరి పంచల్. వయసు 21. గురువారం మధ్యాహ్నం స్థానిక మల్టీప్లెక్స్ థియేటర్‌కు 'మహాయోధ రామా' అనే యానిమేషన్ మూవీ చూసేందుకు వెళ్లాడు.

డెబిట్ కార్డుతో ఈ సినిమాకు టికెట్ తీసుకకున్నాడు

ఈ సినిమా చూసేందుకు కొందరు థియేటర్‌కు వచ్చినా రూ.1,000, 500 నోట్లను కౌంటర్లో తీసుకోకపోవడంతో వెనుదిరిగారు. హరి పంచల్ తన డెబిట్ కార్డుతో ఈ సినిమాకు టికెట్ తీసుకకున్నాడు.
నిబంధనల ప్రకారం మల్టీప్లెక్స్‌ల్లో కనీసం ఐదు టికెట్ల అమ్ముడైతేనే సినిమాను ప్రదర్శిస్తారు. లేకపోతే డబ్బు వాపసు ఇవ్వడం కానీ లేదా వేరే సినిమాకు ఆ టికెట్లతో అనుమతించడం కానీ చేస్తారు.
కానీ తానొక్కడి కోసమే యాజమాన్యం సినిమాను ప్రదర్శించడం చూసి అతనూ ఆశ్చర్యపోయాడు. మోడీ నిర్ణయం వల్లే తనకు ఈ అరుదైన అవకాశం దక్కిందని హరి సంతోషం వ్యక్తం చేస్తున్నాడు. అయితే ఒక్కరి కోసమే షో వేయడంపై మల్టీప్లెక్స్ ప్రతినిధి రాకేష్ పటేల్ స్పందిస్తూ.... పెద్ద నోట్ల రద్దుతో ప్రేక్షకులు బాగా తగ్గిపోయారని, అందుకే నిబంధనలు పక్కనపెట్టి ఎన్ని టిక్కెట్లు అమ్మాని సినిమా నడిపించాలని నిర్ణయించామని తెలిపారు.