ద‌గ్గుబాటి వ‌ర్సెస్ బెల్లం కొండ వార‌సుల ఫైట్‌.. హీరోల మ‌ధ్య ఉన్న లింక్స్‌

‘అహింస‌’ సినిమాలో హీరోగా నటిస్తోన్న అభిరామ్ దగ్గుబాటి ఫ్యామిలీకి చెందినవాడు. ప్రముఖ నిర్మాత డి.సురేష్ బాబు తనయుడు.తనకు ఇది తొలి చిత్రం. తను హీరోగా నిలదొక్కుంటాడా..లేదా? అనేది మ‌రికొన్ని గంట‌ల్లోనే తెలియ‌నుంది. ఇక‘నేను స్టూడెంట్ సర్’ సినిమాలో బెల్లం కొండ సురేష్ వారసుడు గణేష్ హీరో. తనకు ఇది రెండో చిత్రం. ఈ ఇద్ద‌రు హీరోలు నిర్మాత‌ల‌కు చిన్న కొడుకులే కావ‌టం గ‌మ‌నించాల్సిన విష‌యం. 

ఇటు అభిరామ్‌.. అటు బెల్లం కొండ గ‌ణేష్  సోద‌రులు ఇద్ద‌రు హీరోలుగా ఇండ‌స్ట్రీలో ఉన్న‌వారే.  అభిరామ్ సోద‌రుడు రానా ద‌గ్గుబాటి హీరోగా, వెర్సటైల్ యాక్ట‌ర్‌గా రాణిస్తోన్న సంగ‌తి తెలిసిందే. మ‌రో వైపు బెల్లం కొండ గ‌ణేష్ అన్న‌య్య బెల్లంకొండ శ్రీనివాస్ కూడా టాలీవుడ్‌లో హీరోగా సినిమాలు చేస్తున్నారు. ఇప్పుడు అన్న‌య్య‌ల బాట‌లో త‌మ్ముళ్లు సినీ రంగ ప్ర‌వేశం చేశారు. మ‌రి వీరెలా రాణిస్తారో చూడాలి. 

ద‌గ్గుబాటి అభిరామ్ హీరోగా న‌టిస్తోన్న అహింస చిత్రంలో గీతికా తివారికిదే తొలి చిత్రం. మ‌రి ఆమెకు ఈ చిత్రంతో ఎలాంటి గుర్తింపు వ‌స్తుందో తెలియాలంటే మ‌రో మూడు నాలుగు రోజులు ఆగితే స‌రిపోతుంది. మ‌రో వైపు నేను స్టూడెంట్ స‌ర్ చిత్రంతో అవంతిక దాసాని హీరోయిన్‌గా ఎంట్రీ ఇస్తోంది. ఆమె కూడా ఈ చిత్రంపై ఎన్నో ఆశ‌లు పెట్టుకుంది. ఈ సినిమా స‌క్సెస్ అయితే ఆమెకు హీరోయిన్‌గా మ‌రిన్ని అవ‌కాశాలు వ‌స్తాయ‌నే ఎదురు చూస్తోంది. 

ఇద్ద‌రు కొత్త హీరోలు.. డెబ్యూ హీరోయిన్స్‌తో ఎంట్రీ ఇస్తున్న అహింస‌, నేను స్టూడెండ్ స‌ర్ చిత్రాల ద‌ర్శ‌కుల‌ను గ‌మ‌నిస్తే.. అహింస‌కు ద‌ర్శ‌కుడు తేజ‌. ల‌వ్‌స్టోరీస్‌ను డైరెక్ట్ చేయ‌టంలో ఇయ‌న‌కు ప్ర‌త్యేక‌మైన శైలి ఉంది. గ‌తంలో ఈ జోన‌ర్‌లో బ్లాక్ బ‌స్ట‌ర్స్ తెర‌కెక్కించారు. అయితే త‌న జోన‌ర్‌లో మంచి హిట్ కోసం వెయిట్ చేస్తున్నారు. ఇక నేను స్టూడెంట్ స‌ర్ చిత్ర ద‌ర్శ‌కుడిని గ‌మ‌నిస్తే ఆయ‌న పేరు రాఖీ ఉప్ప‌ల‌పాటి. ద‌ర్శ‌కుడిగా ఇదే త‌న‌కు తొలి చిత్రం. మ‌రి డైరెక్ట‌ర్‌గా తొలి హిట్ కొడ‌తాడేమో చూడాలి.