టాలీవుడ్‌కి క్యూ క‌ట్టిన బాలీవుడ్ స్టార్స్‌..!

బాలీవుడ్ సూప‌ర్ స్టార్.. బిగ్ బి అమితాబ్ బ‌చ్చ‌న్ ఇప్పుడు ప్రాజెక్ట్స్ కె చిత్రంలో ప్ర‌భాస్‌తో క‌లిసి న‌టిస్తున్నారు. అలాగని ఏదో చిన్న పాత్ర కాదు.. ప్ర‌భాస్‌తో స‌మానంగా ఉండే రోల్‌లో అమితాబ్ క‌నిపిస్తార‌ని మేక‌ర్స్ చెప్పేశారు. అయితే ప్రాజెక్ట్ కె ఆయ‌న‌కు తొలి తెలుగు సినిమా ఏం కాదు.. అంత‌కు ముందే ఓ చిన్న చిత్రంలో గెస్ట్ అప్పియ‌రెన్స్ ఇచ్చారు. అలాగే మ‌నంలో త‌ళుక్కున మెరిశారు. ఇవి కాకుండా మెగాస్టార్ చిరంజీవి హీరోగా న‌టిస్తోన్న సైరా న‌ర‌సింహా రెడ్డిలో కీల‌క పాత్ర‌లో క‌నిపించి అల‌రించిన సంగ‌తి తెలిసిందే. ఏ మాత్రం వీలున్నా, బిగ్ బి తెలుగు సినిమాల్లో న‌టించ‌టానికి ఆస‌క్తి చూపిస్తున్నారు. 

ధ‌ర్మేంద్ర త‌న‌యుడైన బాబీ డియోల్ తొలిసారి తెలుగులో న‌టిస్తున్నారు. ప‌వ‌ర్‌స్టార్ ప‌వ‌న్ క‌ళ్యాణ్ హీరోగా న‌టిస్తోన్న హ‌రిహ‌ర వీర‌మ‌ల్లు చిత్రంలో మొఘ‌ల్ చ‌క్ర‌వ‌ర్తి ఔరంగజేబు పాత్ర‌లో ఆయ‌న క‌నిపించ‌బోతున్నారు. ఇదే ఆయ‌న తొలి ద‌క్షిణాది సినిమా కావ‌టం కూడా విశేషం. 

అలాగే హ్యాండ్‌స‌మ్ హంక్ అర్జున్ రాంపాల్ సైతం టాలీవుడ్ ఎంట్రీ ఇచ్చేశారు. బాల‌కృష్ణ‌, అనీల్ రావిపూడి కాంబినేష‌న్‌లో రూపొందుతోన్న NBK 108 మూమీలో అర్జున్ రాంపాల్ విల‌న్‌గా అల‌రించ‌బోతున్నారు. 

సైఫ్ అలీఖాన్ ప్ర‌భాస్, ఓం రౌత్ కాంబోలో రూపొందిన ఆదిపురుష్‌లో రావ‌ణాసురుడుగా న‌టిస్తున్నారు. స‌రే ఇది బాలీవుడ్ ప్రొడ‌క్ష‌న్ హౌస్ క‌దా అని అనుకుంటే, ఇప్పుడు ఎన్టీఆర్ 30లో సైఫ్ విల‌న్‌గా మెప్పించ‌బోతున్నారు. దీనికి కొర‌టాల శివ ద‌ర్శ‌క‌త్వం వ‌హిస్తున్నారు. ఇది వ‌చ్చే ఏడాది ఏప్రిల్ 5న రిలీజ్ అవుతుంది. 

బాలీవుడ్ విల‌క్ష‌ణ న‌టుడు న‌వాజుద్దీన్ సిద్ధికీ తెలుగులో తొలిసారి న‌టిస్తున్నారు. ద‌క్షిణాది ఇది వ‌ర‌కే ఆయ‌న ర‌జినీకాంత్ హీరోగా న‌టించిన పేట చిత్రంలో విల‌న్‌గా న‌టించిన సంగ‌తి తెలిసిందే. అయితే తొలిసారి తెలుగులోకి అడుగు పెట్టారు. విక్ట‌రీ వెంక‌టేష్ హీరోగా, శైలేష్ కొల‌ను ద‌ర్శ‌క‌త్వంలో రూపొందుతోన్న సైంధ‌వ్‌లో న‌టిస్తున్నారు. 

బాలీవుడ్ నుంచి టాలీవుడ్‌లోకి ఎంట్రీ ఇస్తోన్న మ‌రో స్టార్ సంజ‌య్ ద‌త్‌. నిజానికి చంద్ర‌లేఖ చిత్రంలో సంజ‌య్ ద‌త్ త‌ళుక్కున మెరిస‌న సంగ‌తి తెలిసిందే. అలాగే క‌న్న‌డ చిత్రమైన కె.జి.య‌ఫ్‌లోనూ న‌టించారు. ఇప్పుడు తెలుగులో ప్ర‌భాస్‌, మారుతి సినిమాలో ఇంపార్టెంట్ రోల్‌లో అల‌రించ‌బోతున్నారు. దీంతో పాటు ద‌ళ‌ప‌తి విజ‌య్, లోకేష్ క‌న‌క‌రాజ్ కాంబోలో రానున్న లియో చిత్రంలోనూ ఆయ‌న న‌టిస్తున్నారు.