మొదటి సినిమా పేరుతో పాపులర్ అయిన టాలీవుడ్ టాప్‌7 సెలబ్రిటీలు

వి.వెంకటరమణా రెడ్డి అంటే ఎవరికీ తెలియకపోవచ్చు. అయితే దిల్ రాజు అంటే మాత్రం అందరికీ కచ్చితంగా తెలుస్తుంది. శ్రీ వేంకటేశ్వర ఆర్ట్స్‌ బ్యానర్‌‌ను స్థాపించి పలు విజయవంతమైన చిత్రాలను తెరకెక్కిస్తున్నారు దిల్‌ రాజు. ఆయన నిర్మాతగా వ్యవహరించిన మొదటి సినిమా 2003లో నితిన్‌  హీరోగా తెరకెక్కిన దిల్. వీవీ వినాయక్ దర్శకత్వం వహించిన ఈ సినిమా సూపర్‌‌ హిట్ అయ్యింది. ఇక, అప్పటి నుంచి దిల్‌ రాజుగా పాపులర్ అయ్యారు.

మెగాస్టార్ చిరంజీవి హీరోగా కె.విశ్వనాథ్ దర్శకత్వంలో తెరకెక్కిన సినిమా శుభలేఖ. 1982లో విడుదలైన ఈ సినిమాలో సుమలత, కైకాల సత్యనారాయణ ముఖ్య పాత్రలు పోషించారు. ఈ సినిమాతోనే ఇండస్ట్రీకి పరిచయమయ్యారు ఎస్‌.సుధాకర్. శుభలేఖ సినిమాలో ఆయన నటనకు మంచి మార్కులు పడ్డాయి. ఇక, అప్పటి నుంచి ఆయన పేరు శుభలేఖ సుధాకర్‌‌గా స్థిరపడిపోయింది.

కవి, పాటల రచయిత అయిన చేంబోలు సీతారామశాస్త్రి.. ‘సిరివెన్నెల సీతారామశాస్త్రి’గా తెలుగు వారందరికీ సుపరిచితులు. సర్వదమన్ బెనర్జీ, సుహాసిని ప్రధాన పాత్రల్లో కె.విశ్వనాథ్ దర్శకత్వం వహించిన సంగీత ప్రధాన చిత్రం సిరివెన్నెల. ఈ సినిమాలో ‘విధాత తలపున ప్రభవించినది’ అనే పాటతో తెలుగు చలనచిత్ర రంగంలోకి ప్రవేశించారు సీతారామశాస్త్రి. అప్పటి నుంచి ఆయన ‘సిరివెన్నెల సీతారామశాస్త్రి’గా ఖ్యాతి పొందారు.

సుమంత్ , జెనీలియా హీరోహీరోయిన్లుగా సూర్య కిరణ్ దర్శకత్వంలో వచ్చిన లవ్‌, మ్యూజికల్ ఎంటర్‌‌టైనర్‌‌ సత్యం. ఈ సినిమాలో కమెడియన్‌గా నటించారు రాజేష్‌ బాబు. సత్యం సినిమాలో సుమంత్ స్నేహితుడిగా రాజేష్‌ నటనకు మంచి పేరు వచ్చింది. 2003లో విడుదలైన ఈ సినిమా తర్వాత నుంచి రాజేష్‌.. ‘సత్యం రాజేష్‌’ పాపులర్ అయ్యారు.

జి.ప్రసాద్.. సంగీత దర్శకుడు. ఈ పేరు చెప్తే బహుశా ఎవరికీ తెలియకపోవచ్చు. అయితే దేవి శ్రీ ప్రసాద్  లేదా డీఎస్పీ అంటే తెలుగు రాష్ట్రాల ప్రజలకు తప్పకుండా తెలుస్తారు. యూత్‌ను ఉర్రూతలూగించే మ్యూజిక్‌, ఎనర్జిటిక్‌ పర్ఫామెన్స్‌తో  అభిమానులను అలరించే వ్యక్తి డీఎస్పీ. 2006వ సంవత్సరంలో  కోడి రామకృష్ణ దర్శకత్వంలో సిజు, ప్రేమ ప్రధాన పాత్రల్లో నటించిన దేవి సినిమాతో సంగీత దర్శకుడిగా పరిచయమయ్యాడు ప్రసాద్. అప్పటి నుంచి ఆయన దేవి శ్రీ ప్రసాద్‌గా పాపులర్ అయ్యారు.

వెన్నెల సినిమాతో టాలీవుడ్‌లోకి కమెడియన్‌గా అడుగుపెట్టారు కిషోర్. ఈ సినిమాలో హీరో రాజాకు ఫ్రెండ్‌గా నటించి ప్రేక్షకులను కడుపుబ్బా నవ్వించారు. వెన్నెల కిషోర్ అసలు పేరు బి.కిషోర్ కుమార్. వెన్నెల సినిమా తర్వాత  ఆయన ‘వెన్నెల కిషోర్‌‌’గా ఫేమస్ అయ్యారు. 2005వ సంవత్సరంలో వచ్చిన వెన్నెల సినిమా నుంచి ఇప్పటి వరకు ఎన్నో సినిమాల్లో నటిస్తూ ప్రేక్షకులను మెప్పిస్తున్నారు.

అల్లరి సినిమాలో హీరోగా నటించి కామెడీ పండించారు. ఆ సినిమా యావరేజ్‌గా ఆడినప్పటికీ నరేష్ పేరుకు ముందు అల్లరి అనేది చేరిపోయింది. రవిబాబు దర్శకత్వంలో 2002వ సంవత్సరంలో విడువలైన ఈ సినిమాతో నరేష్‌ ఇంటిపేరు ‘అల్లరి’గా మారిపోయింది.