భళా తందనాన

భళా తందనాన సినిమా రొమాంటిక్ ఎంటర్టైనర్ చిత్రం ఇందులో శ్రీ విష్ణు, కేథరిన్‌ త్రెసా, రామచంద్ర రాజు తదితరులు నటించారు. ఈ సినిమాకి దర్శకత్వం చైతన్య దంతులూరి వహించారు. రజని కొర్రపాటి నిర్మించారు. సంగీతం మణి శర్మ అందించారు.  కథ శశిరేఖ (క్యాథరిన్ తెరిసా) ఒక ప్రముఖ మీడియా సంస్థలో ఇన్వెస్టిగేటివ్ జర్నలిస్ట్ గా పని చేస్తూ ఉంటుంది. ఒక అనాధ శరణాలయం మీద రైడ్ చేస్తున్న సమయంలో ఆ న్యూస్ కవర్ చేయడానికి వెళ్ళిన ఆమెకు చంద్రశేఖర్(శ్రీ విష్ణు) పరిచయమవుతాడు. వీరిద్దరి మధ్య ప్రేమ చిగురించింది అనుకుంటున్న తరుణంలో తాను ఆనంద్ బాలి (గరుడ రామ్) అనే ఒక హవాలా మాఫియా డాన్ కేసు స్టడీ చేస్తున్నా అనే విషయం వెల్లడిస్తుంది. అదే సమయంలో సిటీలో వరుస మర్డర్లు కలకలం రేపుతాయి. ఆనంద్ బాలి హ్యాండోవర్ లో ఉన్న రెండు వేల కోట్ల రూపాయలు దొంగతనం జరిగిందన్న విషయం తెలుసుకున్న శశిరేఖ దానిని తమ మీడియా సంస్థలో ప్రచురిస్తుంది. దీంతో అనూహ్య పరిస్థితులలో చందు మిస్ అవుతాడు. ఆ రెండు వేల కోట్ల రూపాయలకు చందుకి ఉన్న సంబంధం ఏమిటి? రెండు వేల కోట్ల రూపాయలు ఏమయ్యాయి? చివరికి చందు శశిరేఖ ఒక్కటయ్యారా అనేది సినిమా కథ.