పవన్ కళ్యాణ్ వల్ల మరో డైరెక్టర్ బలయ్యాడంటూ ప్రచారం!

హైదరాబాద్: పవన్ కళ్యాణ్ పై ప్రచారంలోకి వచ్చిన ఓ వార్త అభిమానులకు ఆగ్రహం తెప్పిస్తోంది. చిలవలు పలవలుగా వెలువడుతున్న సదరు పుకార్లను ఫ్యాన్స్ జీర్ణించుకోలేక పోతున్నారు. తమ అభిమాన హీరో పవన్ కళ్యాణ్ వల్ల మరో డైరెక్టర్ కెరీర్ పరంగా బలవుతున్నాడనేది ఆ వార్తల సారాంశం.

పవర్ స్టార్ పవన్ కళ్యాణ్ ‘గబ్బర్ సింగ్-2' గత రెండేళ్లుగా ఈ చిత్రం ప్రారంభానికి నోచుకోకుండా ఊగిసలాడుతూనే ఉంది. సంపత్ నంది దర్శకుడిగా ఈ చిత్రాన్ని మొదలు పెట్టారు. పలు కారణాలతో సినిమా ప్రారంభం కాకముందే సంపత్ నంది ఆ ప్రాజెక్టు నుండి బయటకు వచ్చారు. సంపత్ నంది స్టోరీ, స్క్రిప్టు వర్కు నచ్చకనే ఆయన్ను తీసేసినట్లు టాక్. దీంతో అదే స్టోరీతో సంపత్ నంది రవితేజతో ‘బెంగాల్ టైగార్' ప్లాన్ చేసుకున్నాడు.

తర్వాత ‘పవర్' ఫేం బాబీ గబ్బర్ సింగ్ 2 చిత్రానికి దర్శకుడిగా ఎంపికయ్యారు. పవన్ కళ్యాణే స్వయంగా స్టోరీ సమకూర్చారు. స్క్రిప్టు వర్కు మాత్రం బాబీకి అప్పగించాడు. అయితే బాబీ కూడా పవన్ కళ్యాణ్‌ని మెప్పించలేక పోయాడని టాక్. దీంతో బాబీ కూడా ఈ ప్రాజెక్టు నుండి ఔట్ అయ్యే అవకాశం ఉందంటున్నారు. అయితే పవన్ కళ్యాణ్ తీరుతో బాబీ బలవుతున్నాడనే వార్త ప్రచారంలోకి వచ్చింది.

ఈ పరిణామాల నేపథ్యంలో పవన్ కళ్యాణ్ కొంతకాలం పాటు ఈ ప్రాజెక్టును పక్కన పెట్టాలని నిర్ణయించుకున్నట్లు వార్తలు వినిపిస్తున్నాయి. ఈ ఖాళీ గ్యాపులో దాసరి నారాయణరావు నిర్మాణ సంస్థలో సినిమా చేయాలని పవర్ స్టార్ ఆలోచన చేస్తున్నట్లు ఫిల్మ్ నగర్లో చర్చించుకుంటున్నారు. అయితే ఇంత కాలం పవన్ కళ్యాణ్ సినిమా కారణంగా ఇతర సినిమాలను వదులుకున్న బాబీ కెరీర్ అయోమయంలో పడిందని అంటున్నారు.