కొత్త చెవి రింగులతో పాయల్... మంగళవారం బ్యూటీ అల్లరి చూశారా

ఒకే ఒక్క సినిమాతో తెలుగునాట పాపులర్ అయ్యారు ఉత్తరాది భామ పాయల్ రాజ్‌పుత్. అజయ్ భూపతి దర్శకత్వంలో వచ్చిన ఆర్ఎక్స్ 100 సినిమాతో ఓవర్‌నైట్ స్టార్ అయ్యారు ఈ ముద్దుగుమ్మ. ఈ సినిమాలో ఇందుగా ఆమె నెగిటివ్ షేడ్స్ ఉన్న పాత్రలో నటించారు.

ఢిల్లీకి చెందిన పాయల్ రాజ్‌పుత్ తొలుత బుల్లితెరపై సత్తా చాటారు. 2010లో స్టార్ ప్లస్‌లో ప్రసారమైన సపోన్ సే భారే నైనా అనే ధారావాహికతో నటనవైపు అడుగులు వేశారు పాయల్ రాజ్‌పుత్. ఆ తర్వాత గుస్తాఖ్ దిల్, ఆఖిర్ బహు భి తో బేటీ హీ హై, యే హై ఆషికీ, ప్యార్ తునే క్యా కియా, కౌన్ హై తదితర ధారావాహికలతో బుల్లితెరపై పాగా వేశారు. 

సీరియల్స్ ద్వారా వచ్చిన గుర్తింపుతో ఆర్ఎక్స్ 100 కంటే ముందు పంజాబీలో చెన్నా మెరాయాలో నటించారు పాయల్. అనంతరం హిందీలో వీరేకి వెడ్డింగ్ సినిమాలో నటించారు. ఆర్ఎక్స్ 100 ఘన విజయం సాధించడంతో తెలుగులో ఆమెకు అవకాశాలు క్యూకట్టాయి. 

ఎన్టీఆర్ కథానాయకుడు, సితా, ఆర్‌డీఎక్స్ లవ్, వెంకీ మామ, డిస్కో రాజా, అనగనగా ఒక అతిథి, తీస్ మార్ ఖాన్, జిన్నా, మామా పేటిక తదితర చిత్రాల్లో నటించినా అవి బాక్సాఫీస్ వద్ద డిజాస్టర్‌గా నిలిచాయి. ఆ తర్వాత మరోసారి అజయ్ భూపతి దర్శకత్వంలో చేసిన మంగళవారం సినిమాతో కమ్‌బ్యాక్ ఇచ్చారు పాయల్.

తెలుగుతో పాటు పంజాబీ, హిందీ, తమిళ్, కన్నడ భాషలలో పలు చిత్రాలలో నటించారు పాయల్ రాజ్‌పుత్. ప్రస్తుతం తమిళంలో గోల్‌మాల్, ఏంజెల్‌తో పాటు తెలుగులో కిరాతక సినిమాలలో పాయల్ రాజ్‌పుత్ నటిస్తున్నారు. ఇవన్నీ వచ్చే ఏడాది విడుదలయ్యే అవకాశం ఉంది.