Pawan Kalyan తో మల్టీస్టారర్ సినిమాపై మెగాస్టార్ కామెంట్.. అప్పుడే అంటూ..

వీరయ్య టీమ్ ప్రెస్ మీట్

మెగాస్టార్ చిరంజీవి నటించిన వాల్తేరు వీరయ్య సినిమా జనవరి 13వ తేదీన సంక్రాంతి కానుకగా ప్రేక్షకుల ముందుకు రాబోతోంది. మైత్రి మూవీ మేకర్స్ భారీ బడ్జెట్ తో నిర్మించిన ఈ సినిమాలో మాస్ మహారాజ్ రవితేజ కూడా ఒక ప్రత్యేకమైన పాత్రలో కనిపించబోతున్నాడు. ఇక ఈ సినిమాకు సంబంధించిన ప్రెస్ మీట్ సోమవారం జరగగా అందులో మెగాస్టార్ మల్టీస్టారర్ సినిమాలపై కూడా ప్రత్యేకంగా ఒక వివరణ ఇచ్చే ప్రయత్నం చేశారు.

గతంలోనే మల్టీస్టారర్ ఆలోచనలు

అసలైతే గతంలో చాలాసార్లు మెగాస్టార్ చిరంజీవి మల్టీస్టారర్ సినిమాలు చేయాలని అనుకున్నారు. అందులో నందమూరి బాలకృష్ణ వెంకటేష్ నాగార్జున తో కూడా కొన్ని సినిమాలు చేయాలని ప్రస్తావనకు వచ్చింది. కానీ ఈ ప్రాజెక్టులు సరైన స్క్రిప్ట్ తో ఫిక్స్ కాకపోవడంతో మెగాస్టార్ అటువైపు ఒక పెద్దగా ఆలోచన చేయలేదు. కానీ మిగతా హీరోలు కొందరు మెగాస్టార్ సినిమాలో అతిధి పాత్రలు చేయడానికి బాగానే ఒప్పుకున్నారు.

మళ్ళీ ఇన్నాళ్లకు రవితేజతో..

మెగాస్టార్ చిరంజీవి వాల్తేరు వీరయ్య సినిమాలో రవితేజ కీలకం కాబోతున్న విషయం తెలిసిందే. ఎప్పుడో అన్నయ్య సినిమాలో చిరంజీవి సోదరుడిగా కనిపించిన రవితేజ మళ్ళీ ఇన్నాళ్లకు మరొక డిఫరెంట్ పాత్రలో కనిపించబోతున్నాడు. వీరి మధ్యలో వచ్చే సన్నివేశాలు కూడా చాలా ఆసక్తిగా ఉంటాయి అని తెలుస్తోంది.

ఎవరితో అయినా సిద్ధమే

అయితే రాబోయే రోజుల్లో మెగాస్టార్ చిరంజీవి మిగతా స్టార్ హీరోలతో కూడా మల్టీస్టరర్ సినిమాలు చేస్తారా లేదా అనే ప్రశ్నకు ఆయన సమాధానం ఇచ్చే ప్రయత్నం చేశారు. తప్పకుండా మంచి కథతో అలాంటి మల్టీస్టారర్ ప్రాజెక్టులు వద్దకు వస్తే చేస్తాను అని అన్నారు. అందులో ఎలాంటి సందేహం లేదు అంటూ ఎవరితో చేయడానికి అయినా సరే సిద్ధమే అంటూ చిరు తెలియజేశారు.

పవన్ తో సినిమా..

అలాగే పవర్ స్టార్ పవన్ కళ్యాణ్ తో కూడా సినిమా చేస్తారా అని అడిగినప్పుడు తప్పకుండా చేస్తాను అని అన్నారు. ప్రస్తుతం పవన్ కళ్యాణ్ చాలా బిజీగా ఉన్నారు అని అలాగే నేను కూడా మరికొన్ని ప్రాజెక్టులను పూర్తి చేయాల్సి ఉంది కాబట్టి రెండేళ్ల తర్వాత పవన్ కళ్యాణ్ తో సినిమా చేయడం గురించి ఆలోచిస్తాను అని అన్నారు. మెగాస్టార్ ఆలోచిస్తే మాత్రం తప్పకుండా పవన్ తో సినిమా చేస్తారు అని ఫ్యాన్స్ అయితే నమ్ముతున్నారు. మరి ఈ ఇద్దరి కాంబినేషన్ ఎప్పుడు తెర పైకి వస్తుందో చూడాలి.