ఈ హారర్ సినిమా ఒంటరిగా చూడకండి..చూస్తే ఖచ్చితంగా 'చస్తారు'..!!

అమెరికాలో 2009వ సంవత్సరం అక్టోబరు 16న విడుదలయిన హారర్ మూవీ 'పారానార్మల్ ఆక్టివిటి' (Paranormal Activity) అన్యూహ్యరీతిలో కలెక్షన్లు రాబట్టి సంచలన విజయం సాధించిన సినిమా. కేవలం ఓ వీడియో క్యామ్ సాయంతో ఓరెన్ పెలీ దర్శకత్వంలో రూపొందిన ఈ సినిమాకు అయిన బడ్జెట్ కేవలం 12 వేల అమెరికన్ డాలర్లు. అంటే సుమారు 6 లక్షలు మాత్రమే. కానీ ఈ సినిమా ఒక్క అమెరికాలో సాధించిన వసూళ్లు 100 మిలియన్ డాలర్లు. అంతటి ఘనవిజయం సాధించిన ఈ హారర్ సినిమాను ఒంటరిగా చూడకపోవడం ఉత్తమం అని టైటిల్ వేసి, 17 ఏళ్లలోపు పిల్లలు తల్లిదండ్రుల సమక్షంలో మాత్రమే చూడాలి అనే నిబంధనతో విడుదల చేసారు.

ఇటీవల ఈ సినిమా మీద ఇటలీలోని పిల్లల తల్లిదండ్రులు, ప్రభుత్వం గుర్రుగా వుంది. ఈ సినిమాను బ్యాన్ చెయ్యాలని కూడా యోచిస్తోంది. దీనికి కారణం ఈ సినిమాను చూసిన పిల్లలు మీద ఈ సినిమా విపరీత ప్రభావం చూపించడమే. ఇటీవల ఈ సినిమా చూసిన 10 ఏళ్ల అమ్మాయి థియేటర్లనే కుప్పకూలిపోవడం, అది ఆమె ప్రాణాల మీదకు రావడం జరిగింది. శ్వాశతీసుకోవడానికి కూడా ఆ అమ్మాయి భయపడుతుండటంతో ప్రస్తుతం కృత్రిమంగా గాలిని అందిస్తున్నారు. ఇలాంటి సంఘటనలు రెండు మూడు జరగడంతో ఈ సినిమాను బ్యాన్ చెయ్యాలని చూస్తున్నారు.

మనలోమన మాట హారర్ చిత్రాలంటే ఇష్టపడే వారు తప్పక చూడాల్సిన సినిమా ఇది. థియేటర్లో చూస్తే వచ్చే ఫీల్ టివీల్లో రాకపోయినా, మనకా సదుపాయం లేదు కాబట్టి కనీసం టివీలో అయినా తప్పకుండా చూడాల్సిన సినిమా..!!