గెలుస్తాననుకోలేదు, అంతా బాల్యమిత్రులయ్యారు: ‘బిగ్ బాస్’ విన్నర్ శివ బాలాజీ

బిగ్ బాస్ విన్నర్ అవుతానని ఊహించలేదని శివ బాలాజీ అన్నారు. తనకు సపోర్టు చేసిన ప్రేక్షకులకు, ఇంటి సభ్యులకు థాంక్స్ చెప్పారు.

By Bojja Kumar

Updated: Monday, September 25, 2017, 12:53 [IST]

70 రోజుల పాటు తెలుగు టెలివిజన్ రంగంలో సంచలన రేటింగుతో సాగిన 'బిగ్ బాస్' సీజన్ 1 ఆదివారం(సెప్టెంబర్ 24)తో జరిగిన గ్రాండ్ ఫినాలె షోతో తెరపడిన సంగతి తెలిసిందే. మొత్తం 14 మంది పోటీ పడగా అందరినీ వెనక్కి నెట్టి శివ బాలాజీ విజేతగా నిలిచాడు.

ఫైనల్ కు చేరిన ఐదుగురు సభ్యుల్లో విజేతను ఎంపిక చేసే క్రమంలో ప్రేక్షకుల ఓటింగే చాలా కీలకంగా మారింది. మొత్తం 11 కోట్లకు పైగా ఓట్లు వచ్చాయి. అందులో అత్యధికంగా శివ బాలాజీ 3 కోట్ల 34 లక్షల పైచిలుకు ఓట్లతో విజేతగా అవతరించారు.

50 లక్షల ప్రైజ్ మనీ, ట్రోపీ

విజేతగా నిలిచిన శివ బాలాజీకి రూ. 50 లక్షల ప్రైజ్ మనీతో పాటు, బిగ్ బాస్ సీజన్ 1 విన్నర్ ట్రోపీ అందజేశారు. ఉత్కంఠగా సాగిన గ్రాండ్ ఫినాలె షోలో చివరి క్షణంలో శివ బాలాజీని విన్నర్ గా ప్రకటించారు.

నేను గెలుస్తాననుకోలేదు

శివబాలాజీ మాట్లాడుతూ, ‘నేను విజేతగా నిలుస్తానని అనుకోలేదు. ఈ షో నుంచి మధ్యలో వెళ్లిపోతానని అనుకున్నాను. ‘బిగ్ బాస్' షో చాలా బాగుందని, ఈ షో విజేతగా తాను నిలిచినందుకు ఎంతో ఆనందంగా ఉందని శివబాలాజీ అన్నారు.

వాళ్ల సపోర్టు వల్లే గెలిచాను

నాతో పాటు బిగ్ బాస్ ఇంట్లో కంటెస్టెంట్స్ అందరూ చాలా బాగా గేమ్ ఆడారు. అందరూ మంచి వ్యక్తులు. వాళ్లు అలా ఉండటం వల్లే నేను ఇంత ప్రశాంతంగా, ఇన్ని రోజులు బిగ్ బాస్ ఇంట్లో ఉండగలిగాను అని శివ బాలాజీ అన్నారు.

నా బాల్యమిత్రుల్లా అయ్యారు

‘బిగ్ బాస్ లో పాల్గొన్న వారు ఈ షో జరిగే క్రమంలో నాకు చాలా క్లోజ్ అయ్యారు. ఎంత క్లోజ్ గా అంటే నా బాల్య మిత్రులంత దగ్గరయ్యారు. ఆడియన్స్ ఇంత సపోర్ట్ వస్తుందని ఊహించలేదు. నాకు సపోర్టు చేసిన ప్రతి ఒక్కరికీ థ్యాంక్స్' అని శివ బాలాజీ వ్యాఖ్యానించారు.