రాజమౌళి కొడుకుపై చీటింగ్ ఆరోపణలు.... ఏం జరిగింది?

ఓ ప్రముఖ పత్రిక వెబ్ సైట్లో కార్తికేయ గురించి ఓ సంచలన వార్త వచ్చింది. కార్తికేయపై డ్రోన్ సంస్థ యజమాని, ఆపరేటర్ చీటింగ్ ఆరోపణలు చేశారని ఆ కథనం సారాంశం.

అయితే ఆరోపణలు చేసిన వ్యక్తి పేరు బయట పెట్టకుండా ఈ కథనం ఉండటం గమనార్హం. తన పేరును వెల్లడించేందుకు సదరు సంస్థ నిర్వాహకుడు అంగీకరించలేదని ఆ కథనంలో పేర్కొనబడి ఉంది.

సినిమాకు డ్రోన్ ఆపరేటర్లు కావాలంటూ వారాహి చలన చిత్రం నుంచి ఫోన్ వచ్చిందని, తమతో పనిచేయించుకుని, తన డ్రోన్లను వారి వద్దే పెట్టుకుని తనకిచ్చే డబ్బులను కూడా ఇవ్వలేదని సదరు వ్యక్తి ఆరోపించినట్లు ఆ కథనంలో ఉంది.

డ్రోన్లను తయారుచేసి, పరీక్షించడానికి టైం పడుతుందని ఈమెయిల్ ద్వారా కూడా వారికి స్పష్టంగా చెప్పాము. ఏమైందో ఏమో కానీ, తన డ్రోన్లను వారి వద్దే పెట్టుకుని అర్దాంతరంగా తమను తప్పించారని వాపోయినట్లు తెలుస్తోంది.

మా పనికి సగం డబ్బులు మాత్రమే చెల్లించారు. ఇంకా రూ.2 లక్షలు చెల్లించాల్సి ఉంది. డబ్బులు చెల్లించకపోగా మా డ్రోన్లను వాళ్ల దగ్గరే ఉంచుకుని ఇవ్వడం లేదని....పేరు చెప్పడానికి ఇష్టపడని సదరు డ్రోన్ సరఫరాదారు వాపోయారట.

అయితే సదరు డ్రోన్ సంస్థ యజమాని పేరు చెప్పకుండా కథనం ప్రచురించిన ప్రముఖ పత్రిక వెబ్ సైట్.... కేవలం వన్ సైడ్ వెర్షన్ మాత్రమే చెప్పుకొచ్చారు. అసలు అతడి వాదనలో వాస్తవం ఏమిటి? కార్తికేయ వెర్షన్ ఏమిటి? అనేది తెలియపరుచలేదు.

నాగచైతన్య హీరోగా వస్తున్న యుద్ధం శరణం సినిమా ‘వారాహి చలన చిత్రం' బేనర్లో తెరకెక్కుతోంది. కార్తికేయ కూడా ఈ సినిమాకు లైన్ ప్రొడ్యూసర్‌గా పనిచేస్తున్నారు. ఈ సినిమాకు సంబంధించిన వ్యవహారంలోనే ఈ డ్రోన్ల గొడవ జరిగినట్లు తెలుస్తోంది.