అతడే..? శృతి హాసన్‌పై దాడి వాస్తవాలు(ఫోటో ఫీచర్)

By Bojja Kumar

Published: Wednesday, November 20, 2013, 16:26 [IST]

ముంబై: హీరోయిన్ శృతి హాసన్‌పై ముంబైలోని తన అపార్టుమెంటులోకి రాత్రి 9 గంటల తర్వాత ప్రవేశించిన గుర్తు తెలియని దుండగుడు ఆమెపై దాడి చేయడానికి ప్రయత్నించిన సంగతి తెలిసిందే. శృతి హాసన్ తలుపు తీయగానే దుండగుడు ఆమె గొంతు పట్టుకుని తోసేసి ఇంట్లోకి చొరబడటానికి ప్రయత్నించాడు.

వెంటనే అప్రమత్తమైన శృతి అతన్ని తోసేసి తలుపును వేయడంతో అతని చేయికి దెబ్బ తాకింది. చాకచక్యంగా వ్యవహరించి డోర్ లాక్ చేసుకుంది. దాంతో అతను పారిపోయాడు. ఈ ఘటనతో షాక్‌కు గురైన శృతి హాసన్ ఇప్పుడిప్పుడే కోలుకుంటోంది. ఈ సంఘటన మీడియా ద్వారా బయటకు పొక్కడంతో ఇతర సెలబ్రిటీలు, అభిమానులు ట్విట్టర్ ద్వారా ఆమెకు మెసేజ్‌లు పంపుతూ ఓదార్చే ప్రయత్నం చేసారు.

ఈ సంఘటన అనంతరం అంతా తనకు సపోర్టుగా నిలవడంతో శృతి హాసన్ ధైర్యం తెచ్చుకుంది. రాత్రి 12 గంటల వరకు తనకు ట్విట్టర్లో మెసేజ్ పంపిన వారందరికీ థాంక్స్ చెబుతూ రిప్లై ఇస్తూ గడిపింది. ముంబై బాంద్రాలోని ఓ అపార్టుమెంటులో శృతి హాసన్ 6వ ఫ్లోర్లో నివాసం ఉంటోంది.

శృతి హాసన్‌పై దాడి ఘటనను పోలీసులు సీరియస్‌గా తీసుకున్నారు. దాడికి ప్రయత్నించింది ఎవరు? ఏ కారణంతో దాడి జరిగింది అనే విషయమై వివిధ కోణాల్లో విచారణ జరుపుతున్నారు. గతంలో అతను ఎప్పుడైనా ఆమెను కలిసాడా? ఇబ్బంది పెట్టిన సందర్భాలు ఏమైనా ఉన్నాయా? అనే విషయాలపై ఆరా తీస్తున్నారు.

శృతి హాసన్ గుర్తుపట్టక పోవడమే కారణమా?

శృతి హాసన్‌పై దాడికి పాల్పడిన వ్యక్తి గతంలో పలు సందర్భాల్లో సినిమా సెట్లలో ఆమెను కలిసినట్లు సమాచారం. అయితే శృతి హాసన్ తనను గుర్తు పట్టక పోవడం, తనతో మాట్లాడక పోవడంతో అతను కోపోద్రిక్తుడైనట్లు సమాచారం. బలవంతంగా డోర్ తీసుకుని ఆమె ఇంట్లోకి ప్రవేశించడానికి ప్రయత్నించినట్లు తెలుస్తోంది.