‘షంషీరా’ ఫస్ట్ లుక్: బందిపోటుగా మారిన లవర్‌బాయ్ హీరో

బందిపోటుగా రణబీర్ కపూర్

ప్రముఖ బాలీవుడ్ సినీ నిర్మాణ సంస్థ యశ్‌రాజ్ ఫిలింస్ నిర్మిస్తున్న ‘షంషీరా' చిత్రంలో రణబీర్ కపూర్ బందిపోటుగా కనిపించబోతున్నాడు. ఈ చిత్రానికి సంబంధించిన ఫస్ట్ లుక్ పోస్టర్ విడుదలైంది. ‘అగ్నిపథ్', ‘బ్రదర్స్' ఫేం కరణ్ మల్హోత్రా దర్శకత్వంలో ఈ మూవీ తెరకెక్కనుంది.

ఇలాంటి సినిమా కోసం చాలా కాలంగా...

ఈ సినిమా గురించి రణబీర్ కపూర్ మాట్లాడుతూ... ‘షంషీరా లాంటి సినిమా కోసం నేను చాలా కాలంగా ఎదురు చూస్తున్నాను. చిన్నతనం నుండి హిందీలో ఎన్నో కమర్షియల్ సినిమాలు చూస్తూ పెరిగా.... అలాంటి సినిమాల్లో చేయాలని ఎప్పటి నుండో కోరిక ఉండేది. ఇన్నాళ్లకు షంషీరా సినిమా ద్వారా నా కోరిక తీరబోతోంది. ఈ సినిమాను ఒక ఛాంలెజింగ్‌గా తీసుకుని చేస్తున్నాను. దర్శకుడు కరణ్ ఈ సినిమా ద్వారా నన్ను కొత్తగా చూపించే ప్రయత్నం చేయబోతున్నారు' అని రణబీర్ కపూర్ తెలిపారు.

9 ఏళ్ల తర్వాత వీరి కాంబినేసన్లో

యశ్‌రాజ్ ఫిలింస్ బేనర్లో రణబీర్ కపూర్ ‘బచ్నా యే హసీనా' సినిమా ద్వారా తొలి హిట్ కొట్టాడు. తర్వాత అతడు ఇదే బేనర్లో నటించిన ‘రాకెట్ సింగ్-సేల్స్ మేన్ ఆఫ్ ది ఇయర్' చిత్రంలో పెర్ఫార్మెన్స్‌కు మంచి మార్కులు పడ్డాయి. దాదాపు 9 ఏళ్ల తర్వాత యశ్ రాజ్ ఫిలింస్‌తో కలిసి మసాలా ఎంటర్టెన్మెంటుతో కూడిన దేశీ మెగా యాక్షన్ మూవీ ‘షంషీరా' చేస్తున్నారు.

మూవీ షంషీరా మోషన్ పోస్టర్

రణబీర్ కెరీర్లో హై ఓల్టేజ్ యాక్షన్ సినిమాగా ఈ చిత్రం తెరకెక్కబోతోంది. అభిమానులు ఇప్పటి వరకు చూడని సరికొత్త రణబీర్ కపూర్‌ను ఈ చిత్రంలో చూపించబోతున్నారు. ఈ ఏడాది చివర్లో సినిమా సెట్స్ మీదకు వెళుతుందని, 2019లో జూన్ వరకు షూటింగ్ పూర్తి చేయాలనే ప్లాన్లో ఉన్నట్లు సమాచారం.