Thegimpu Business: అజిత్ మూవీకి షాకింగ్ బిజినెస్.. అన్ని మూవీలు ఉన్నా కోట్లలో.. ఎంతొస్తే హిట్ అంటే!

తెగింపు మూవీతో వస్తున్న అజిత్

థలా అజిత్ కుమార్ హీరోగా హెచ్ వినోథ్ రూపొందించిన చిత్రమే 'తెగింపు'. యాక్షన్ ఎంటర్‌టైనర్‌గా రూపొందిన ఈ సినిమాలో మంజూ వారియర్‌ హీరోయిన్‌గా చేసింది. బాలీవుడ్ ఫిల్మ్ మేకర్ బోనీ కపూర్ దీన్ని నిర్మించారు. ఇక, ఈ చిత్రానికి జిబ్రాన్ మ్యూజిక్ అందించాడు. ఇందులో సముద్రఖని, వీరా, భగవతి పెరుమాల్, అజయ్ తదితరులు కీలక పాత్రలను పోషించారు.

అలాంటి కథ.. భారీ అంచనాలు

ఓ వ్యక్తి ఓ మాల్‌ను హైజాక్ చేయడం.. అతడిని పట్టుకోడానికి పోలీసులు ప్రయత్నించడం.. ఈ క్రమంలోనే అతడి బ్యాగ్రౌండ్ తెలుసుకోవడం వంటి అంశాలతో 'తెగింపు' సినిమా తెరకెక్కింది. ఇప్పటికే ఈ చిత్రం నుంచి విడుదలైన అన్ని ప్రచార చిత్రాలకు భారీ స్పందన దక్కింది. దీంతో ఈ సినిమాపై అంచనాలు తారాస్థాయిలోనే ఏర్పడ్డాయి. ఫలితంగా దీనికి డిమాండ్ వచ్చింది.

రిలీజ్ డేట్ ఇష్యూ... గొడవలతో

'తెగింపు' మూవీని సంక్రాంతి కానుకగా విడుదల చేస్తున్నట్లు నిర్మాతలు ఎప్పుడో ప్రకటించారు. ఆ తర్వాత ఇళయదళపతి విజయ్ నటించిన 'వారసుడు' కూడా అదే రోజు విడుదల చేస్తున్నట్లు ప్రకటించారు. ఇలాంటి పరిస్థితుల్లో తమిళంలో థియేటర్ల ఇష్యూ కారణంగా వివాదం చెలరేగింది. అలాగే, అక్కడ ఇద్దరు హీరోల అభిమానుల మధ్య భీకరమైన పోరు జరుగుతోంది.

ప్రమోషన్స్.. తెలుగులో లేవుగా

'తెగింపు' మూవీని సంక్రాంతి కానుకగా జనవరి 11న విడుదల చేస్తున్నట్లు చిత్ర యూనిట్ ఇప్పటికే ప్రకటించింది. ఈ మేరకు చిత్ర యూనిట్ ప్రమోషన్ కార్యక్రమాలను ఎప్పుడో ప్రారంభించింది. ఇందులో భాగంగానే తమిళంలో ఈవెంట్‌లను కూడా నిర్వహించారు. కానీ, తెలుగులో మాత్రం దీనికి పెద్దగా ప్రచారం చేయడం లేదు. ఇది సినిమాకు మైనస్ అవ్వొచ్చు.

ఏ ఏరియాలో ఎంత బిజినెస్?

అజిత్ హీరోగా నటించిన 'తునివు' లేదా 'తెగింపు' మూవీకి తమిళనాడులో ఏకంగా రూ. 60 కోట్లు బిజినెస్ జరిగినట్లు ట్రేడ్ వర్గాలు తెలిపాయి. అలాగే, కేరళలో రూ. 2.50 కోట్లు, కర్నాటకలో రూ. 3.80 కోట్లు, నార్త్ ఇండియాలో రూ. 1.75 కోట్లు బిజినెస్ అయింది. అలాగే ఓవర్సీస్‌లో దీనికి రూ. 15 కోట్లు వ్యాపారం జరిగింది. ఇలా మొత్తంగా రూ. 83.02 కోట్లు బిజినెస్ అయింది.

తెలుగులో బిజినెస్ వివరాలివే

అజిత్ నటించిన 'తెగింపు' మూవీకి తెలుగులో కూడా భారీ బిజినెస్ జరిగింది. తాజా సమాచారం ప్రకారం.. నైజాం ఏరియాలో రూ. 1.20 కోట్లు, సీడెడ్‌లో రూ. 40 లక్షలు, ఆంధ్రా ఏరియా మొత్తంలో కలిపి రూ. 1.60 కోట్లు బిజినెస్ జరిగింది. ఇలా ఆంధ్రా, తెలంగాణలో కలిపి రూ. 3.20 కోట్లు వ్యాపారం అయింది. అంటే.. ప్రపంచ వ్యాప్తంగా దీనికి రూ. 86.25 కోట్లు బిజినెస్ జరిగింది.

ఈ సినిమా హిట్ అవ్వాలంటే

తమిళం సంగతి పక్కన పెడితే.. తెలుగులో సంక్రాంతికి మరో మూడు సినిమాలు విడుదల కాబోతున్నాయి. అయినప్పటికీ అజిత్ కుమార్ గత చిత్రాల కంటే 'తెగింపు'కు ఎక్కువ బిజినెస్ జరిగింది. ఇక, ఈ సినిమాకు తెలుగు రాష్ట్రాల్లో రూ. 3.20 కోట్లు బిజినెస్ జరిగింది. అంటే ఈ చిత్రం క్లీన్ హిట్‌గా నిలవాలి అంటే రూ. 3.50 కోట్లు షేర్‌ను వసూలు చేయాల్సి ఉంటుంది.