సమస్యలో ‘కబాలి’ తెలుగు వెర్షన్, దాసరి జోక్యం, ధియోటర్స్ ఇవ్వం

ఈ వివాదానికి నాలుగేళ్ళ క్రితం రజనీ నటించిన ‘కొచ్చాడియాన్‌' (తెలుగులో విక్రమసింహా) సినిమానే కారణం. ఆ సినిమా డిజాస్టర్ కావటంతో ఆ ఆర్దిక లావాదేవీలు కొన్ని ఇంకా క్లియర్ కాలేదు.

‘కొచ్చాడియాన్‌' రజనీ కుమార్తె సౌందర్య దర్శకత్వం వహించగా, చిత్రానికి సంబంధించిన ఆర్థికలావాదేవీలను రజనీకాంత్‌ సతీమణి లత చూశారు. ఈ చిత్రం తెలుగు హక్కులను లక్ష్మీగణపతి ఫిలింస్‌ సంస్థ సుమారు 10 కోట్లకు కొనుగోలు చేసింది.

2012లో రజనీ బర్త్‌డే సందర్భంగా డిసెంబర్‌ 12న రిలీజ్‌ కావాల్సిన ఈ చిత్రం పలు కారణాల వల్ల వాయిదా పడుతూ 2014లో రిలీజైంది. ఆలస్యం కారణంగా లక్ష్మీగణపతి సంస్థ ఈ చిత్రం హక్కులు వదులుకునేందుకు సిద్దపడి ఈ విషయాన్ని లతకు తెలియజేశారు. దీనిపై వెంటనే లత స్పందించలేదు.

చివరగా ‘కొచ్చాడియన్‌' రిలీజ్‌ తేదీ సమీపించాక 10 కోట్లను డిస్ట్రిబ్యూషన్‌ అడ్వాన్స్‌గా పరిగణిస్తామని, సినిమాను రిలీజ్‌ చేయమని కోరిందట. నేరుగా లత నుండి హమీ లభించడంతో ‘కొచ్చాడియన్‌' తెలుగులో రిలీజైంది. కానీ ప్రేక్షకారణ లభించలేదు.

కేవలం రెండున్నర కోట్ల మాత్రమే రికవరీ అయింది. మిగతా మొత్తం అంటే 7.50 కోట్లు డిస్ట్రిబ్యూషన్‌ అడ్వాన్స్‌ కాబట్టి తిరిగి ఇవ్వాల్సిందిగా రజనీకాంత్‌ సతీమణి లతను కోరితే ఆమె నుండి ఎలాంటి స్పందన లేదు.

పదే పదే ఫోన్‌ ద్వారా, మెయిల్స్‌ ద్వారా సంప్రదించినప్పటికీ లాభం లేకపోయింది. సంస్థ ప్రతినిధులు పలుమార్లు చెన్నై చేరుకుని రజనీకాంత్‌ని కలిసే ప్రయత్నం చేసినప్పటికీ అపాయింట్‌మెంట్‌ దొరకలేదట.

ఏడున్నర కోట్ల రూపాయలను ఎట్టిపరిస్థితుల్లో లత నుండి వసూలు చేసి తెలుగు నిర్మాతకు ఇప్పించాలనే ప్రయత్నాలు సీరియస్‌గా జరుగుతున్నాయి. ఈ వివాదంపై చిత్ర సంబంధికుల నుండి ఇప్పటి వరకు సమాచారం లేదు. అయితే ఆదివారం పంపిణీదారులు, ఎగ్జిబిటర్లు సమావేశం అయ్యారు.

రజనీకాంత్‌ సతీమణి లతా నుండి ఇప్పటి వరకు ఎలాంటి స్పష్టమైన హామీ లభించకపోవడంతో చివరికి ‘కబాలి' సినిమా రిలీజ్‌కు బ్రేక్‌ వేసే వరకు పరిస్థితి చేరుకుంది.

దాసరి నారాయణరావు దృష్టికి తీసుకెళ్ళి న్యాయం కోసం అభ్యర్థించగా ఆయన ఒక పెళ్లి నిమిత్తం హైదరాబాద్‌ వచ్చిన రజనీకాంత్‌కు విషయం తెలిపారట. సమస్యను పరిష్కరించాల్సింది అంటూ ‘లింగ' చిత్ర నిర్మాత రాక్‌లైన్‌ వెంకటేశ్‌కు రజనీ అప్పజెప్పారు. అయినప్పటికీ నిర్మాతలకు డబ్బు తిరిగిరాలేదు.

చెన్నై, బెంగుళూరు పలుమార్లు తిరిగినా న్యాయం జరగలేదు. దీంతో ఒక తెలుగు నిర్మాతకు జరిగిన అన్యాయం గురించి టాలీవుడ్‌ పంపిణీ దారులు, థియేటర్ల యాజ మాన్యాలు ఒక్క తాటిపై నిలిచాయి.

తెలుగు నిర్మాతకు డబ్బులు తిరిగి ఇచ్చేవరకు ‘కబాలి'కి సహాయ నిరాకరణ చేయాలని నిర్ణయించుకు న్నాయి. సోమవారం వరకు థియేటర్ల నిర్ణయం జరక్క పోతే ‘కబాలి ‘ తెలుగు రాష్ట్రా ల్లో రిలీజ్‌ అవడం కష్ట మని ఎగ్జిబిటర్లు అంటున్నారు.

‘కబాలి' తెలుగు హక్కుల కోసం చాలామంది నిర్మాతలు పోటీపడ్డారు. ‘కబాలి ‘ నిర్మాత భారీ ధర చెప్పడంతో కొంతమంది తప్పుకున్నారు. సినీపరిశ్రమలో ఎలాంటి అనుభవం లేని గుంటూరుకు చెందిన ఒక వ్యక్తి భారీ మొత్తం చెల్లించి కబాలి తెలుగు రైట్స్‌ కొన్నారని తెలిసింది. ఆయనకు పరిశ్రమలోని కొందరు ప్రముఖులు ఫైనాన్స్‌ చేసి కొనిపించారని ప్రచారం జరుగుతోంది.

ఇప్పుడు ‘కబాలి' రిలీజ్‌ డేట్‌ ప్రకటించడంతో పరిశ్రమలో కదలిక వచ్చింది. అందరు ఐకమత్యంగా ఉంటే సాటి నిర్మాతకు న్యాయం జరుగుతుందని భావిస్తున్నారు. శనివారం నాడు జరిగిన సమావేశంలో కూడా థియేటర్లు ఇవ్వకూడదని నిర్ణయించుకున్నారు.

లత చేసిన అప్పుకు రజనీకాంత్‌కు సంబంధం లేదని కొన్నవారంటున్నారు. ‘కబాలి' నిర్మాత పేరు వేరే ఉన్నప్పటికీ రజనీకాంత్‌కు ఇది సొంత చిత్రమని, బినామిగా వేరే పేరుతో తీస్తున్నారని తెలుగు నిర్మాతలు ఆరోపిస్తున్నారు.

ఎయిర్‌ ఏషియా స్పెషల్‌ ప్యాకేజ్‌, కబాలి యాప్‌, కబాలి ఇమోజీ, వెండి నాణెలు ఇలా పలు విధాలుగా రజనీకాంత్‌ తన సూపర్‌స్టార్‌ ఇమేజ్‌ను చాటుకున్నారు.

జులై 22 ప్రపంచ వ్యాప్తంగా విడుదల చేస్తున్న ఈ చిత్రాన్ని అమెరికాలో 400 స్క్రీన్లపై విడుదల చేస్తున్న సంగతి తెలిసిందే. అయితే అక్కడ ముందస్తు బుకింగ్‌లో ఈ చిత్రం టికెట్లు కేవలం రెండు గంటల్లోనే అయిపోయినట్లు సమాచారం. ఇది ఆశ్చర్యాన్ని కల్గిస్తున్నా.. నమ్మక తప్పని సత్యం అంటున్నారు సినీ వర్గాలు.

పా రంజిత్‌ దర్శకత్వం వహిస్తున్న ఈ చిత్రానికి కలైపులి ఎస్‌ థను నిర్మాతగా వ్యవహరిస్తున్నారు. సంతోష్‌ నారాయణన్‌ చిత్రానికి సంగీతం సమకూరుస్తున్నారు. ఈ చిత్రంలో రజినీకాంత్‌ సరసన రాధికా ఆప్టే నటించారు.