మాస్క్‌తో పబ్లిక్‌లోకి అల్లు అర్జున్: కారణం అదేనా, ఇంకేమైనా...

హైదరాబాద్: సినీ హీరోలు కాస్తా అసాధారణంగా కనిపిస్తే చాలు, పుకార్లు షికార్లు చేస్తుంటాయి. ఇటీవల అల్లు అర్జున్ ముఖానికి మాస్క్ ధరించి ఓ కార్యక్రమానికి హాజరు కావడంపై పలు రకాల ఊహాగానాలు చెలరేగుతున్నాయి. ఆయన ప్రస్తుతం హరీష్‌ శంకర్‌ దర్శకత్వంలో 'దువ్వాడ జగన్నాథమ్‌' సినిమాలో నటిస్తున్నాడు.

ఈ సినిమాలో బన్నీ తొలిసారి ఓ బ్రాహ్మణ యువకుడి పాత్రలో కనిపించబోతున్నాడు. ఇటీవలే బన్నీ అబుదాబిలో జరిగిన సాంగ్‌ షూటింగ్‌లో పాల్గొన్నాడు. ఆ వెంటనే హైదరాబాద్‌లో జరిగిన అల్లు రామలింగయ్య అవార్డుల వేడుకకు హాజరయ్యాడు.

అంతవరకు బాగానే ఉంది. కానీ ఈ ఈవెంట్‌కు బన్నీ ముఖానికి ఓ మాస్క్‌తో హాజరుకావడం చర్చనీయాంశంగా మారింది. ప్రస్తుతం నటిస్తున్న 'డీజే' సినిమాలోని బ్రాహ్మిణ యువకుడి పాత్ర కాకుండా మరో పాత్రలో కూడా అల్లు అర్జున్ కనిపించనున్నట్లు చెబుతున్నారు.

ఆ పాత్ర తాలుకు లుక్‌ రివీల్‌ కాకుండా ఉండేందుకే బన్నీ ఇలా మాస్క్‌లో వచ్చాడని అంటున్నారు అబుదాబిలో షూటింగ్‌ కారణంగా బన్నీని జలుబు, దగ్గు తీవ్రంగా బాధిస్తున్నాయని, అలెర్జీ మరింత ముదరకుండా ఉండేందుకే ఇలా మాస్క్‌ వేసుకున్నాడని కూడా టాక్ ఉంది.