హోమ్

హీరో

సుధీర్ బాబు హీరోగా ప్రస్తుతం వరుసగా ప్రాజెక్ట్‌లు పట్టాలెక్కుతున్నాయి. సమ్మోహనం తరువాత మళ్లీ ఆ రేంజ్ హిట్ మాత్రం సుధీర్ బాబు కొట్టలేకపోయాడు. వీ మూవీతో మంచి హిట్ కొట్టేందుకు చాలానే ప్రయత్నించాడు. కానీ అది అంతగా ఆకట్టుకోలేకపోయింది. ఓటీటీలో విడుదలైన ఈ మూవీ అంతగా వర్కవుట్ కాలేదు. ఇంద్రగంటి మోహనకృష్ణతో చేసిన సమ్మోహనం క్లిక్ అయింది కానీ V చిత్రం మాత్రం మిశ్రమ ఫలితాన్ని దక్కించుకుంది.

V సినిమా ఫలితాన్ని పక్కన పెట్టేసిన సుధీర్ బాబు కొత్త ప్రాజెక్ట్ 'శ్రీదేవి సోడా సెంటర్'పై శ్రద్ద పెట్టాడు. ఆ మధ్య రిలీజ్ చేసిన మోషన్ పోస్టర్ ఓ రేంజ్‌లో వైరల్ అయింది. లైట్స్ ఫిట్టింగ్ చేసేవాడిగా సుధీర్ బాబు ఫస్ట్ లుక్ ఓ రేంజ్‌లో క్లిక్ అయింది. జాతరలో సోడా బండిని నడుపుకుంటూ లైట్స్ ఫిట్టింగ్స్ చేసే సూరి బాబు పాత్రలో సుధీర్ బాబు దుమ్ములేపనున్నాడు. అందుకోసం సుధీర్ బాబు బాగానే కసరత్తు చేస్తున్నాడు.

ప్రస్తుతం శ్రీదేవీ సోడా సెంటర్ స్క్రిప్ట్‌ను చదువుతూ అదే లోకంగా బతుకుతున్నట్టు కనిపిస్తోంది. శ్రీదేవీ సోడా సెంటర్ ప్రపంచంలో బతుకుతున్నాను అని చెబుతూ.. ఫస్ట్ హాఫ్‌కు సంబంధించిన స్క్రిప్ట్‌ను చదువుతున్న ఫోటోను షేర్ చేశాడు. మణిశర్మ సంగీతమందిస్తున్న ఈ సినిమాను పలాస ఫేమ్ కరుణ కుమార్ తెరకెక్కిస్తున్నాడు. వచ్చే ఏడాది నుంచి ఈ మూవీ సెట్స్ పైకి వెళ్లనున్నట్టు తెలుస్తోంది. ఆ తరువాత మళ్లీ ఇంద్రగంటి మూవీని పట్టాలెక్కించనున్నట్టు సమాచారం.