ఫాస్ట్ అండ్ ఫ్యూరియస్ 7: ఇండియాలో హయ్యెస్ట్ కలెక్షన్స్

హైదరాబాద్: హాలివుడ్ యాక్షన్ చిత్రాలు ఇష్టపడే ఇండియన్ సినీ ప్రేమికులు ‘ఫాస్ట్ అండ్ ఫ్యూరియస్ 7' సినిమా కోసం చాలా కాలంగా ఎదురు చూస్తున్నారు. సినిమా ఏప్రిల్ 2న విడుదల కావడంతో సినీ అభిమానులంతా థియేటర్లకు క్యూ కట్టారు. ఫలితంగా ఈ చిత్రం గతంలో ఏ హీలీవుడ్ సినిమా సాధించని విధంగా తొలి రోజు హయ్యెస్ట్ కలెక్షన్ సాధించింది. సినిమా హిట్ టాక్ తెచ్చుకోవడంతో వసూళ్లు మరింత పెరుగుతాయని ఆశిస్తున్నారు.

తొలి రోజు ఈ చిత్రం ఇండియా వ్యాప్తంగా రూ. 12 కోట్లు వసూలు చేసింది. ఇప్పటి వరకు ఇండియాలో విడుదలైన హాలీవుడ్ చిత్రాల్లో ఇదే అత్యధిక వసూళ్లు. ఈ రోజు గుడ్ ఫ్రైడే హాలిడే కావడం, శని, ఆది వారాలు వీకెండ్ కావడంతో సినిమా వసూళ్లు పెరుగుతాయని ఆశిస్తున్నారు.

విన్ డీజెల్, డ్వేన్ జాన్సన్(ది రాక్), జాసన్ స్టాతమ్, పాల్ వాకర్ లాంటి స్టార్స్ నటించిన ఈ చిత్రానికి జేమ్స్ వాన్ దర్శకత్వం వహించారు. వాస్తవానికి ఈ చిత్రం గతేడాదే విడుదల కావాల్సి ఉంది. ఈ చిత్రంలో నటించిన హాలీవుడ్ స్టార్ పాల్ వాకర్ కారు యాక్సిడెంటులో మరణించడంతో సినిమా విడుదల ఆలస్యం అయింది.

ప్రపంచ వ్యాప్తంగా వేలాది థియేటర్లలో వివిధ భాషల్లో ఈ చిత్రం విడుదలైంది. వసూళ్ల పరంగా ఈ చిత్రం 1 బిలియన్ డాలర్ల మార్కను అందుకుంటుందని భావిస్తున్నారు. ఇప్పటికీ సినిమాకు పాజిటివ్ టాక్ వచ్చింది. సినిమాలోని అద్భుతమైన పోరాట సన్నివేశాలు ప్రేక్షకులకు థ్రిల్ చేస్తున్నాయి. యాక్షన్ సినిమాలు ఇష్టపడే అభిమానులకు ఈ చిత్రం తప్పకుండా నచ్చుతుంది.