కడప దర్గాలో ఎ ఆర్‌ రెహ్మాన్‌ ఖవ్వాలీ..వివరాలు

కడప : కడపలోని సుప్రసిద్ధ అమీన్‌ పీర్‌ దర్గాలో మూడు రోజుల ఉర్స్‌ మహోత్సవాలకు రంగం సిద్ధమైంది. గంధ మహోత్సవంతో శనివారం నుంచి మూడు రోజుల పాటు జరిగే ఈ వేడుకల్లో భాగంగా రెండవ రోజైన జనవరి 13వ తేదీన ప్రముఖ సంగీత దర్శకుడు, ఆస్కార్‌ విజేత ఎ ఆర్‌ రెహ్మాన్‌ ప్రత్యేక ఖవ్వాలీ కచేరీ చేస్తారు.

దర్గా కార్యదర్శి సయ్యద్‌ అమీర్‌ ఈ మేరకు వివరాలందిస్తూ సంగీత దర్శకుడు ఎ ఆర్‌ రెహ్మాన్‌ తరచూ దర్గాను సందర్శించి ప్రార్థనలు చేస్తుంటారని చెప్పారు. రెహ్మాన్‌ కచేరీని భక్తులంతా వీక్షించేందుకు వీలుగా దర్గా పరిసరాలలో భారీ తెరలు ఏర్పాటు చేస్తామన్నారు. వీలైనంత ఎక్కువమంది ఈ ఖవ్వాలీతో పాటు మూడు రోజులూ జరిగే పలు సంగీత కార్యక్రమాలను తిలకించే ఏర్పాట్లు చేస్తామన్నారు.

అమీన్‌ పీర్‌ దర్గాలో మూడు రోజుల ఉర్స్‌ మహోత్సవాలలో భాగంగా 13వ తేదీన ఉర్స్‌ ఉత్సవం జరుగుతుంది. చివరి రోజైన 14వ తేదీన తలీల్‌ను నిర్వహిస్తారు. ఈ దర్గా అత్యంత మహిమాన్వితమైనదిగా విశ్వసిస్తూ ఏటా పెద్ద సంఖ్యలో భక్తులు ఇక్కడికి వస్తుంటారు. ప్రస్తుతం రహమాన్..రూపొందించిన కడలి ఆడియో తెలుగులోనూ విడుదలైంది. పాటలు యావరేజ్ గా ఉన్నాయని అభిమానలు అంటున్నా..సినిమా విడుదల అయ్యాక పాటలు మరింతగా చొచ్చుకుపోతాయని, ఆదరణ పొందుతాయని భావిస్తున్నారు.