‘వెన్ను పోటు’ సాంగ్ వివాదం: నేనే ప్రత్యక్ష సాక్షి... రామ్ గోపాల్ వర్మకు శివాజీ కౌంటర్!

రాముడు ఎలా చేశాడో...

రామాయణంలో రాముడు వాలిపై చెట్టు చాటు నుంచి బాణం వేసినపుడు దాని వెనక ఉన్న పరమార్థం వేరు. సుగ్రీవుడి భార్యను చెరపట్టి రాజ్యాన్ని తన అధీనంలోకి తీసుకుని తమ్ముడిని రాజ్య బహిష్కరణ చేశాడు. అపుడు రాముడు అది ధర్మం కాదని చెప్పి ధర్మానికి అనుకూలంగా నిలబడ్డాడు. చంద్రబాబు నాయుడు కూడా అలాగే చేశారు.. ఆ రోజు తెలుగు దేశం పార్టీ ఉన్న పరిస్థితికి, లక్ష్మీ పార్వతి ఆ పార్టీని కబ్జా చేయాలనుకున్నారు కాబట్టి, యావత్ పార్టీ అంతా కలిసి ఓ నిర్ణయం తీసుకుని, పార్టీని, రాష్ట్రాన్ని సేవ్ చేయడానికి వైస్ రాయ్ హోటల్ లో ఆ నిర్ణయం తీసుకున్నారు. కాబట్టి అది వెన్నుపోటు కాదు వెన్ను దన్ను... అని శివాజీ అభిప్రాయ పడ్డారు.

నేను ప్రత్యక్ష సాక్షిని

వైస్ రాయ్ సంఘటన జరిగినపుడు నేను హైదరాబాద్‌ వైస్ రాయ్ వద్దనే ఉన్నాను. పొట్ట కూటి కోసం హైదరాబాద్ వచ్చాను. ఆ రోజున అదే చైతన్య రథం మీద చెప్పులు విసిరిన మనిషి కూడా లక్ష్మీపార్వతికి సంబంధించిన మనిషే. ఆ రోజు పరిటాల రవి బస్సుమీద నుంచి దూకారు. ఆ మనిషిని చూసిన తర్వాత వెనక్కి వెళ్లిపోయారు. చంద్రబాబు చేసింది వెన్నుపోటు కాదు.. వెన్ను దన్ను అని శివాజీ నొక్కి వక్కానించారు.

లక్ష్మీస్ ఎన్టీఆర్

రామ్ గోపాల్ వర్మ తెరకెక్కిస్తున్న ‘లక్ష్మీస్ ఎన్టీఆర్' ఎన్టీ రామారావు జీవితంలోని పలు వివాదాస్పద అంశాల ఆధారంగా రూపొందుతోంది. రామారావు జీవితంలోకి లక్ష్మీపార్వతి వచ్చిన తర్వాత చోటు చేసుకున్న పరిణామాలు ఈ చిత్రంలో చూపించబోతున్నారు.

ఎన్టీఆర్ బయోపిక్-ఇటు లక్ష్మీస్ ఎన్టీఆర్

ఓ వైపు ఎన్టీ రామారావు జీవితంపై ఎన్టీఆర్ బయోపిక్ వస్తుండగా... అందులో చూపించని వివాదాస్పద అంశాలతో లక్ష్మీస్ ఎన్టీఆర్ చిత్రాన్ని ప్రేక్షకుల ముందుకు తెస్తున్నాడు రామ్ గోపాల్ వర్మ. మరి ఈ చిత్రానికి ప్రేక్షకుల నుంచి ఎలాంటి స్పందన వస్తుందో చూడాలి.