హోమ్

న్యూస్

అల్లు అర్జున్ హీరోగా త్రివిక్రమ్ రూపొందించిన 'అల వైకుంఠపురములో' మూవీ నేటికీ రికార్డుల సునామీ సృష్టిస్తూనే ఉంది. సంక్రాంతి కానుకగా విడుదలైన ఈ సినిమా ఇప్పటికే 150 కోట్లకు పైగా వసూలు చేసి బన్నీ కెరీర్ లోనే బిగ్గెస్ట్ హిట్ సినిమాగా నిలిచింది. ఈ చిత్రంలో అల్లు అర్జున్ సరసన పూజా హెగ్డే నటించి తన అందచందాలతో మత్తెక్కించింది.

ఇక ఇవన్నీ ఒకెత్తయితే 'అల వైకుంఠపురములో' మూవీ పాటలు మరో ఎత్తు. విడుదలకు ముందు నుంచే హంగామా మొదలుపెట్టిన ఈ పాటలు నేటికీ ఫుల్ ఫామ్ లో ఉండటం విశేషం. థమన్ బాణీలు సంగీత ప్రియులను ఓ రేంజ్‌లో ఆకర్షించాయి. దీంతో ఈ పాటలు సృష్టించిన అలజడి ఎంతో ప్రత్యేకంగా చెప్పాల్సిన పనిలేదు.

మరీ ముఖ్యంగా 'సామజవరగమన', 'రాములో రాములా' సాంగ్స్ వేటికవే ప్రత్యేకంగా నిలుస్తూ సినిమా విజయంలో కీలక పాత్ర పోషించాయి. 'అల వైకుంఠపురములో' సినిమాని మరో స్థాయిలో నిలబెట్టాయి. యూ ట్యూబ్ వరల్డ్ లో అయితే సెన్సేషన్ క్రియేట్ చేశాయి. కాగా తాజాగా 'రాములో రాములా' సాంగ్ అరుదైన రికార్డ్ నమోదు చేసింది. అతి తక్కువ కాలంలో యూ ట్యూబ్‌లో 200 మిలియన్ వ్యూస్ సాధించిన పాటగా తన పేరును లిఖించుకుంది. ఈ మేరకు తమ ఆనందం వ్యక్తం చేస్తూ కొత్త పోస్టర్ రిలీజ్ చేశారు మేకర్స్.