అల్లరి నరేష్ లడ్డూ బాబు వచ్చే నెలకు వాయిదా

హైదరాబాద్: అల్లరి నరేష్ హీరోగా తెరకెక్కుతున్న 'లడ్డూ బాబు' చిత్రాన్ని తొలుత ఫిబ్రవరి నెలలోనే విడుదల చేయాలని ప్లాన్ చేసారు. కానీ ఈ నెలలో సినిమా విడుదల వీలు కాకపోవడంతో మార్చి నెలలో సినిమాను విడుదల చేయడానికి ప్లాన్ చేస్తున్నట్లు చిత్ర యూనిట్ సభ్యులు చెబుతున్నారు.

రవి బాబు దర్శకత్వంలో తెరకెక్కుతున్న ఈ చిత్రంలో నరేష్ భారీకాయుడిగా కనిపించనున్నాడు. చాలా కాలం తర్వాత భూమిక ఈ సినిమాలో ప్రధానపాత్రలో కనిపించనున్నారు. ఈ చిత్రం పూర్తి కామెడీ నడుస్తుందని తెలుస్తోంది. ఇప్పటికే ఈ చిత్రం టీజర్స్ ప్రేక్షకుల్లో ఆసక్తిని క్రియేట్ చేసాయి. ఈ సినిమాలో నరేశ్‌ మేకప్‌ కోసమే భారీగా వ్యయం చేశారని సమాచారం.

అల్లరి నరేష్

రవి బాబు సినిమాలంటేనే కాస్త ప్రత్యేకంగా ఉంటాయి. మరి ఈ సినిమా ఎలా ఉండబోతోందో చూడాలి. నరేష్‌ -రవిబాబు కాంబినేషన్‌లో వచ్చిన 'అల్లరి' ఎంతటి సంచలనమో తెలిసిందే. కామెడీ నేరేషన్‌లో సరికొత్త పంథాని తెలుగు తెరకి పరిచయం చేశారు దర్శకుడు రవిబాబు. అయితే ఆ సినిమా తర్వాత నరేష్‌, రవిబాబు ఎవరిదారిలో వారు కెరీర్‌ పయనం సాగించారు. ఇన్నాళ్టికి వీరిద్దరి కలయికలో మరో సినిమా వస్తుండటం చర్చనీయాంశం అయింది

అల్లరి నరేష్ ఇతర సినిమాల విషయాల్లోకి వెళితే....దీంతో పాటు ఆయన 'జంప్ జిలానీ' అనే చిత్రంలో నటిస్తున్నారు. ఇ సత్తిబాబు దర్శకత్వం వహిస్తున్న ఈ చిత్రంలో అల్లరి నరేష్ ద్విపాత్రాభినయం చేస్తున్నాడు. అంబికా కృష్ణ సమర్పణలో అంబిక రాజా ఈ చిత్రాన్ని నిర్మిస్తున్నారు. విజయ్ సంగీతం అందిస్తుండగా, దాశరథీ శివేంద్ర సినిమాటోగ్రఫీ చేస్తున్నారు. సమ్మర్లో ఈచిత్రం విడుదలై ప్రేక్షకులకు కితకితలు పెట్టనుంది.