Akhanda OTT: బాలయ్య సినిమా స్ట్రీమింగ్‌కు డేట్ ఫిక్స్.. పండుగ కానుకగా ఆరోజే.. మరి టీవీలో ఎప్పుడంటే!

‘అఖండ’గా ఎంటరైన బాలయ్య

నటసింహా బాలకృష్ణ హీరోగా బోయపాటి శ్రీను రూపొందించిన సినిమానే 'అఖండ'. ఎంతో ప్రతిష్టాత్మకంగా రూపొందిన ఈ మూవీని ద్వారకా క్రియేషన్స్ బ్యానర్‌పై మిర్యాల రవీందర్ రెడ్డి నిర్మించాడు. ఈ మూవీలో ప్రగ్యా జైస్వాల్ హీరోయిన్‌గా చేసింది. శ్రీకాంత్ నెగెటివ్ రోల్ చేశాడు. ఎస్ థమన్ ఈ సినిమాకు సంగీతం అందించాడు. ఇది డిసెంబర్ 2న గ్రాండ్‌గా రిలీజ్ అయింది.

భారీ రెస్పాన్స్... జై బాలయ్య అని

క్రేజీ కాంబినేషన్‌లో వచ్చిన 'అఖండ' మూవీకి ప్రపంచ వ్యాప్తంగా భారీ స్థాయిలో స్పందన వచ్చింది. చాలా కాలంగా మాంచి మాస్ మూవీ కోసం చూస్తున్న ప్రేక్షకులకు ఈ సినిమా ఫుల్ మీల్స్ పెట్టేసింది. దీంతో ఈ చిత్రానికి ఆరంభం నుంచే పాజిటివ్ టాక్ వచ్చింది. అందుకు అనుగుణంగానే కలెక్షన్లు భారీగా వచ్చాయి. దీంతో అంతలా జై బాలయ్య అనే మాటే వినిపిస్తూ వచ్చింది.

రెండు వారాల్లోనే టార్గెట్ కంప్లీట్

నందమూరి బాలకృష్ణ కెరీర్‌లోనే రెండో అత్యధిక బిజినెస్ (రూ. 53)తో 'అఖండ' మూవీ వేట మొదలు పెట్టింది. ఆంధ్రప్రదేశ్‌లో టికెట్ ధరల సమస్య ఉన్నా దీనికి మంచి కలెక్షన్లే వచ్చాయి. ఇక, నైజాంలో ఇది దుమ్ముదులిపేసింది. అలాగే మిగిలిన ప్రాంతాల్లోనూ సత్తా చాటింది. ఇలా దీనికి భారీ స్పందన దక్కడంతో రెండో వారంలోనే టార్గెట్ చేరుకుని హిట్ స్టేటస్‌ను అందుకుంది.

నిర్మాతలకు భారీ లాభాలు తెచ్చి

'అఖండ' మూవీకి ఆరంభం నుంచే మంచి రెస్పాన్స్ దక్కుతూ వచ్చింది. ఫలితంగా దాదాపు అన్ని ప్రాంతాల్లోనూ బిజినెస్‌ను దాటి కలెక్షన్లను రాబట్టింది. ఇలా ఇప్పటికీ మంచి రెస్పాన్స్‌నే అందుకుంటూ కలెక్షన్లను బాగానే అందుకుంటోంది. దీంతో ఈ సినిమా ఇప్పటి వరకూ రూ. 16 కోట్లకు పైగానే లాభాలను కూడా అందుకుంది. ఫలితంగా ఈ ఏడాది బిగ్ హిట్‌గా నిలిచింది.

అఖండ ఓటీటీ.. టీవీ వివరాలివే

'సింహా', 'లెజెండ్' వంటి రెండు బ్లాక్ బస్టర్ హిట్ల తర్వాత నందమూరి బాలకృష్ణ, బోయపాటి శ్రీను కాంబినేషన్‌లో వచ్చిన చిత్రమే 'అఖండ'. ఎన్నో అంచనాలతో వచ్చి థియేటర్లలో సందడి చేసిన ఈ సినిమా డిజిటల్ స్ట్రీమింగ్ హక్కులను డిస్నీ ప్లస్ హాట్‌స్టార్ సంస్థ సొంతం చేసుకుంది. అలాగే, శాటిలైట్ హక్కులను స్టార్ మా ఛానెల్ భారీ ధరకు కొనుగోలు చేసింది.

అఖండ స్ట్రీమింగ్ డేట్ వచ్చింది

'అఖండ' మూవీ ప్రేక్షకుల ముందుకు వచ్చి దాదాపు నాలుగు వారాలు అవుతున్నా రెస్పాన్స్ మాత్రం మంచిగానే వస్తోంది. ఈ నేపథ్యంలో ఈ మూవీ డిజిటల్ ప్రీమియర్‌ డేట్ బయటకు వచ్చింది. తాజా సమాచారం ప్రకారం.. ఈ చిత్రాన్ని సంక్రాంతి పండుగ కానుకగా జనవరి 12 నుంచి డిస్నీ ప్లస్ హాట్‌స్టార్‌లో స్ట్రీమింగ్ చేయబోతున్నారట. ఈ ప్రకటన త్వరలోనే రానుందని టాక్.

అఖండ టీవీలో వచ్చేది అప్పుడే

ఎంతో ప్రతిష్టాత్మకంగా వచ్చిన 'అఖండ' మూవీని ఇప్పటికే ప్రేక్షకులు థియేటర్లలో చూసేశారు. కొద్ది రోజుల్లోనే ఇది ఓటీటీలోకి కూడా రాబోతుంది. ఈ నేపథ్యంలో ఇప్పుడు ఈ సినిమా టెలివిజన్ ప్రీమియర్ డేట్‌ కూడా రివీల్ అయింది. తాజా సమాచారం ప్రకారం.. ఈ సినిమా ఫిబ్రవరి 27న వరల్డ్ టెలివిజన్ ప్రీమియర్‌గా స్టార్ మా ఛానెల్‌లో ప్రసారం కాబోతుందని తెలిసింది.