మా వాళ్లకు హిందీ సినిమాలంటే ప్రేమ: అమీనా

By Pratap

| Published: Thursday, October 25, 2012, 18:38 [IST]

ముంబై: తమ దేశ ప్రజలపై బాలీవుడ్ సినిమాల ప్రభావం అధికంగా ఉంటుందని పాకిస్తాన్ నటి, మోడల్ అమీనా షేక్ అన్నారు. ముంబై చలనచిత్రోత్సవాల్లో ఆమె నటించిన జోష్ చిత్రం ప్రదర్శితమవుతోంది. ఈ సందర్భంగా ఆమె గురువారం ముంబైకి వచ్చారు. పాకిస్తానీల్లో చాలా మంది బాలీవుడ్ సినిమాలను ప్రేమిస్తారని ఆమె మీడియా ప్రతినిధులతో అన్నారు.

పాకిస్తాన్ ప్రజలు తమ సినిమాలను బాలీవుడ్ సినిమాలతో పోల్చి చూస్తుంటారని ఆమె తెలిపారు. బాలీవుడ్‌లో మీ అభిమాన నటులెవరని అడిగితే అభిషేక్ బచ్చన్, రణబీర్ కపూర్‌లతో నటించాలని తనకు ఆసక్తిగా ఉందని అమీనా షేక్ చెప్పారు.

మాత్, ఉరాన్, హమ్ తుమ్, దామ్ వంటి టీవీ సీరియళ్లలో అమీనా షేక్ నటించారు. షేక్ న్యూయార్క్‌లో జన్మించారు. బాల్యం మాత్రం కరాచీ, రియాద్‌ల్లో గడిచింది. తాము బాలివుడ్‌తో పోటీ పడాలని పాకిస్తాన్ ప్రజలు కోరుకుంటున్నారని అన్నారు. మౌలిక సదుపాయాల విషయంలో ఇరు దేశాల సినీ పరిశ్రమలకు మధ్య పొంతన లేదని, కానీ తామేమీ చేయలేమని, ప్రజలు బాలీవుడ్‌తో తాము పోటీ పడాలని ఆశిస్తున్నారని అన్నారు.

అమీనా షేక్ నటించిన జోష్ చిత్రానికి ఇరామ్ పర్వీన్ బిలాల్ దర్శకత్వం వహించారు. ముంబై చలన చిత్రోత్సవాల్లో ప్రదర్శితమైన పాకిస్తాన్ చిత్రం ఇదొక్కటే. తాను ఇండియాకు తొలిసారి వచ్చినట్లు అమీనా షేక్ చెప్పారు. జోష్‌ను ఎంతో పేషన్‌తో, హృదయంతో నిర్మించినట్లు తెలిపారు. తాను ఈ చిత్రంలో ఫాతిమా పాత్రను పోషించినట్లు తెలిపారు. ఫాతిమా పాత్ర ప్రగతిశీల, అర్బన్ యువతులకు ప్రాతినిధ్యం వహిస్తుందని చెప్పారు.

Comments

English summary

Bollywood's influence on Pakistani lives and on its film industry is undeniable, says model-actress Aamina Sheikh, a well-known face in the neighboring country's fashion and entertainment sector.

Story first published: Thursday, October 25, 2012, 18:38 [IST]

Other articles published on Oct 25, 2012