మణిరత్నం ఇంటర్వూ : సినిమా.. ఆలోచనలు

ముంబై నేపథ్యంలోనే మీ సినిమాలు...కారణం

అక్కడ నేను కొన్నేళ్లపాటు చదువుకొన్నా. దానికితోడు మన అభివృద్ధిని, ఆధునికతను ప్రతిబింబించే ఓ ప్రధాన నగరం అది. అందరికీ సంబంధించిన ఓ కథని అలాంటి నేపథ్యంలో సులభంగా చెప్పొచ్చన్నది నా అభిప్రాయం. అరవయ్యేళ్ల వయసులో యువతరం ఆలోచనల్ని ప్రతిబింబించే సినిమా తీశారు...

మీ వయస్సు ఎంతో..

నేనిప్పటికీ 22ఏళ్ల కుర్రాణ్నే (నవ్వుతూ).

లివ్ ఇన్ రిలేషన్ షిప్ మీదే కానీ..

'ఓకే బంగారం' సహజీవనం నేపథ్యంలో సాగే చిత్రంగా చెబుతున్నారు. అయితే సహజీవనం గురించి మాత్రమే నేనీ సినిమా తీయలేదు. ఇందులో పెళ్లి గురించి ప్రధానంగా ప్రస్తావించాం. ప్రస్తుతం సమాజం ఎలా ఉంది? యువతరం నడవడిక, ఆలోచనలు ఎలా ఉన్నాయో ఇందులో చూపిస్తున్నా.

కథ గురించి ఎలాంటి పరిశోధన?

పరిశోధన అనేది జీవితంలో ఓ భాగం. ఎప్పుడూ చేస్తూ ఉండాల్సిందే. కథ రాసుకొనేటప్పుడు కూడా ఏదైనా ఒక ప్రత్యేకమైన పాత్రని తీర్చిదిద్దాలన్నప్పుడు దాని గురించి పరిశోధన చేయాల్సిందే. అయితే ఆ పాత్ర జీవితం, దాని తాలూకు భావోద్వేగాల గురించి ఒక అవగాహనకు రావాలంటే ఆ పాత్రను పరిపూర్ణంగా అనుభవించాల్సిందే.

లైవ్ రికార్డు చేసారన్నారు..

ఈ సినిమాని చిత్రీకరిస్తున్న సమయంలోనే తమిళంలో సంభాషణల్ని రికార్డ్‌ చేశాం. ఆ విషయంలో నేను గర్వపడుతున్నా. సెట్‌కి వెళ్లే సమయంలోనే అలా లైవ్‌లో రికార్డ్‌ చేయాలని నిర్ణయించుకొన్నా, చేశా. కొన్ని ఇబ్బందులు ఎదురయ్యాయి. అలాగని భయపడి వెనకడుగు వేయకూడదు. ఆ మాటకొస్తే ఇబ్బందులు లేనిదెక్కడ? సినిమా చిత్రీకరణ కష్టంతో కూడుకొన్న పనే. మేం అనుకొన్నది చేశాం. భవిష్యత్తులోనూ ఈ ప్రయోగం కొనసాగిస్తానేమో!

జాగ్రత్తలు

ప్రత్యేకంగా ఫలానా వాళ్లకి నచ్చేలా ఉండాలని నేను కథలు రాసుకోను. నన్ను నేను దృష్టిలో ఉంచుకొని కథ రాసుకొంటాను.

ఎ.ఆర్‌.రెహమాన్‌తో కలిసి చేయటంలో...

నాకు ఎలాంటి రాగాలు తెలియవు. రెహమాన్‌ సినిమాకి ఏది అవసరమైతే అది సమకూరుస్తుంటారు. నేను ఓకే చేస్తుంటానంతే.

చాలా కాలం తర్వాత పి.సి.శ్రీరామ్‌తో పనిచేశారు..

తను నా సినిమాల్లో ఎప్పుడూ ఏదో ఒక రకంగా భాగమవుతూనే ఉంటారు. తను నా సినిమాకి పనిచేయనీ, చేయకపోనీ నా కథల గురించి చర్చిస్తూనే ఉంటా.

సీతారామ శాస్త్రి గారితో...

'ఓకే బంగారం'కి సిరివెన్నెల సీతారామశాస్త్రిగారితో కలిసి పనిచేయడం గొప్ప అనుభవం. నా సినిమాలకి పాటలు రాసే వేటూరి గారి ఫ్లేవర్‌లోనే సీతారామశాస్త్రిగారు అద్భుతమైన పాటలు ఇచ్చారు.