Home

News

ఆకాశమంత దర్శకుడు రాధామోహన్ అందించిన మరో క్లాసిక్ చిత్రం 'మోలి". డ్యూయెట్ మూవీస్ పతాకంపై ప్రకాష్ రాజ్ ఈ చిత్రాన్ని తమిళంలో రూపొందించారు. జ్యోతిక, పృథ్వీరాజ్‌, ప్రకాష్‌ రాజ్‌ కీలకపాత్రధారులు. తెలుగులో 'మాటరాని మౌనమిది" పేరుతో అనువాదమౌతోంది. ఇండస్‌ ఇన్‌ స్పిరేషన్స్‌ అధినేత ఎన్‌.ఎ.కాంతారావు ఇక్కడ అందిస్తున్నారు. ఈ సినిమా లోగోను ఫిలిం చాంబర్‌ లో ఆవిష్కరించారు. వేడుకలో దర్శకసంఘం అధ్యక్షుడు సాగర్‌, నిర్మాతలమండలి కార్యదర్శి ప్రసన్నకుమార్‌, ఎన్‌.ఎ.కాంతారావు, భారతీబాబు, శశాంక్‌ వెన్నెలకంటి, ప్రభు తదితరులు పాల్గొన్నారు.

ఈ సందర్భంగా నిర్మాత మాట్లాడుతూ 'విషయం, నాణ్యత రెండిటిపైనే విజయం ఆధారపడి ఉంటుంది. మంచి ఫీల్‌ గుడ్‌ సినిమా ఇది. ప్రకాష్‌ రాజ్‌ అద్భుతంగా నటించారు. జ్యోతిక బధిరురాలు పాత్రలో నటించి ఉత్తమనటి అవార్డ్‌ అందుకొంది. బ్రహ్మానందం సినిమా సాంతం కనిపిస్తారు. తెలుగు సినిమాను మరిపిస్తుంది. నవంబర్‌ తొలివారంలో ఆడియో విడుదల చేస్తాం" అన్నారు. తర్వాత నవంబర్ 12న ప్రేక్షకుల ముందుకు తీసుకువస్తున్నట్టు నిర్మాత ఎన్ అచ్యుత కాంతారావు చెప్పారు.