బర్తడే బోయ్ 'అమితాబ్' అరుదైన ఫోటోలు

అక్టోబర్ 11,1942 ఆలిండియా మెగాస్టార్ అమితాబ్ జననం. తమ గారాల బిడ్డకి స్వాతంత్య్ర ఉద్యమ స్ఫూర్తితో తండ్రి హరివంశరాయ్‌, తల్లి తేజీ 'ఇంక్విలాబ్‌' అనే పేరుని నిర్ణయించారు. అయితే వారి కుటుంబ మిత్రుడు, హిందీ కవి సుమిత్రానంద్‌ పంత్‌కి ఆ పేరు నచ్చలేదు. అనంతమైన ప్రకాశం అనే అర్థంలో అమితాబ్‌ అని నామకరణం చేశారు.

నిజానికి అమితాబ్ ఇంటి పేరు బచ్చన్‌ కాదు. అది హరివంశరాయ్‌ కలం పేరు. వాళ్ల ఇంటి పేరు శ్రీవాస్తవ. బచ్చన్ కలం పేరుతో అమితాబ్ తండ్రి చాలా రచనలు చేసారు. తర్వాత అదే ఆ కుటుంబానికి ఇంటిపేరుగా మారిపోయింది. ఆ పేరు ప్రపచం మొత్తం నిరతంరం తలుచుకునే స్ధాయికి వస్తుందని హరివంశరాయ్ ఆ రోజున ఊహించి ఉండరు. కలం పేరు ఓ కుటుంబపేరులా స్ధిరపడిపోయింది.

తమ్ముడు అజితాబ్‌ ప్రేరణతోనే రంగుల లోకం వైపు అడుగులు వేశారు. కలకత్తాలో చేస్తున్న ఉద్యోగం మానేసి బొంబాయికి చేరుకొన్నారు. అక్కడ అవకాశాలు లేక ఆకలితో సముద్ర తీరంలోని బల్లలపై పడుకొన్న రోజులూ ఆయన జీవితంలో ఉన్నాయి. చివరకు నర్గీస్‌ ఇచ్చిన సిఫార్సు లేఖను కె.ఎ.అబ్బాస్‌కి ఇస్తే 'సాత్‌ హిందుస్థానీ'లో నటించే అవకాశం ఇచ్చారు. ఆ సినిమా అట్టర్ ప్లాప్ అయ్యింది. కానీ అమితాబ్ కి బెస్ట్ న్యూ కమర్ గా నేషనల్ అవార్డు తెచ్చిపెట్టింది. అక్కడి నుంచి అమితాబ్‌ సినీ ప్రయాణం మొదలైంది.

అమితాబ్ బొంబాయి వచ్చేటప్పుడు మరచిపోకుండా తెచ్చుకున్నదేమిటో తెలుసా? డ్రైవింగ్‌ లైసెన్స్‌. సినిమా అవకాశం కోసం పోరాడతాను. ఒక వేళ దక్కకపోతే ఎవరి దగ్గరైనా కారు డ్రైవర్‌గా పని చేద్దామనుకొన్నాను అంటారు అమితాబ్‌. ఆయన మొదటి సూపర్‌ హిట్‌ సినిమా ప్రకాష్‌ మెహరా దర్శకత్వం వహించిన 'జంజీర్‌'. రచయిత సలీం జావిద్‌ రాసిన 'జంజీర్‌'లో మొదటిగా అమితాబ్‌ మెరిశారు. యాంగ్రీ యంగ్ మెన్ గా బాలీవుడ్ లో స్ధిరపడ్డారు. ఈ చిత్రానికి గానూ ఫిల్మ్ ఫేర్ నామినేషన్ పొందారు అమితాబ్.

1973లో అమితాబ్ జీవితంలో మరో మలుపు. తన తోటి నటి జయ బాధురీని ఆయన వివాహం చేసుకున్నారు. ఆయనకు శ్వేత, అభిషేక్ బచ్చన్ ఇద్దరు పిల్లలు కలిగారు. అమితాబ్, జయ కలిసి జంజీర్(1973), అబిమాన్(1973), చుప్కే చుప్కే (1975), మిలీ(1975), షోలే(1975)లో నటించారు. వారిద్దరూ కలిసి నటించిన చివరి నటించిన చిత్రం కభి ఖుషీ కభి గమ్.