చంపేస్తారా నేను రెడీ.. మా తమ్ముడి కోసమే దూరంగా ఉంటున్నా.. నాగబాబు!

ట్రోల్ చేసిన నెపంతో

జనసేన కార్యకర్తలు కొందరు టిడిపికి చెందిన సాధినేని యామినిని ట్రోల్ చేశారనే నెపంతో పోలీసులు అరెస్ట్ చేసి దాడులకు పాల్పడిన ఘటన జరిగింది. పోలీసులు అన్యాయంగా జనసేన కుర్రాళ్ళపై థర్డ్ డిగ్రీ ప్రయోగించారని ఆరోపిస్తున్నారు. అసలు ఎలాంటి పరిస్థితుల్లో థర్డ్ డిగ్రీ ప్రయోగిస్తారో మీకు తెలుసా అని ప్రశ్నించారు. అధికార పక్షం ఒత్తిడి వల్లే పోలీసులు దారుణంగా వ్యవహరించారని నాగబాబు అన్నారు.

అలా అనుకుంటే పొరపాటే

ఇలా అధికారం చేతిలో పెట్టుకుని కేసులు పెడితే మేము భయపడిపోతాం అని అనుకుంటే పొరపాటే అని నాగబాబు అన్నారు. ఇంతకు 100 రెట్లు శక్తితో తిరిగి పోరాడతాం అని అన్నారు. సాధినేని యామిని నేరుగా వచ్చి జనసేన కార్యకర్తని చెంపదెబ్బ కొట్టినట్లు తనకు తెలిసిందని నాగబాబు అన్నారు. ఎంతకాలం మీ చేతిలో అధికారం ఉంటుంది అని నాగబాబు చంద్రబాబుని ప్రశ్నించారు.

తమ్ముడి కోసం

నేను జనసేన పార్టీ మెంబర్ ని కాదు. కానీ ఆ పార్టీకి అభిమానిని. మా తమ్ముడిపై, జనసేన పార్టీపై కుటుంబ పార్టీ అనే ముద్ర రాకూడదనే దూరంగా ఉంటున్నట్లు నాగబాబు తెలిపారు. ఇప్పటికే 59 ఏళ్ళు వచ్చాయి. ఇక తాను దేనికీ భయపడాల్సిన అవసరం లేదు అని నాగబాబు అన్నారు. సోషల్ మీడియాలో మాత్రమే మాట్లాడుతున్నారు అని అంటున్నారు. బయటకు వచ్చి పోరాడగల శక్తి కూడా తనకు ఉందని తెలిపారు.

చంపేస్తారా నేను రెడీ

జనసేన కార్యకర్తలపై ఇలాంటి సంఘటనలు మళ్ళి రిపీట్ అయితే నేరుగా నేనే వచ్చి పోరాటానికి కూర్చుంటా. నన్ను కొడతారా.. చంపేస్తారా.. నేను రెడీ అని నాగబాబు అన్నారు. జనసేన కార్యకర్తల అరెస్ట్ పై ముఖ్యమంత్రి చంద్రబాబు, హోమ్ మంత్రి చినరాజప్ప, రాష్ట్ర డిజిపి క్షమాపణ చెప్పాలని నాగబాబు కోరారు.