‘టక్ జగదీష్’ నుంచి సర్‌ప్రైజింగ్ పోస్టర్: ఇప్పటి వరకూ కనిపించని లుక్‌లో నాని

ఎన్నో సినిమాల్లో సహజసిద్ధమైన నటనతో మెప్పించి తక్కువ సమయంలోనే స్టార్ హీరోగా ఎదిగిపోయాడు నేచురల్ స్టార్ నాని. కెరీర్ ఆరంభంలో అసిస్టెంట్ డైరెక్టర్‌గా పని చేసిన అతడు... 'అష్టాచెమ్మ'తో హీరోగా పరిచయం అయ్యాడు. ఆ తర్వాత ఎన్నో చిత్రాల్లో అద్భుతమైన నటనతో ఆకట్టుకున్నాడు. ఇక, ఈ మధ్య కాలంలో భారీ చిత్రాల్లో నటిస్తోన్న నాని.. ప్రస్తుతం పలు చిత్రాలకు గ్రీన్ సిగ్నల్ ఇచ్చేశాడు. వాటిలో శివ నిర్వాణ దర్శకత్వంలో రూపొందుతోన్న 'టక్ జగదీష్' ఒకటి. క్రిస్మస్ సందర్భంగా ఈ సినిమా నుంచి సర్‌ప్రైజింగ్ పోస్టర్ విడుదల అయింది.

'నిన్ను కోరి' తర్వాత నాని - శివ నిర్వాణ కాంబినేషన్‌లో వస్తోన్న చిత్రం 'టక్ జగదీష్'. షైస్ స్క్రీన్స్ బ్యానర్‌పై సాహు గారపాటి, పెద్ది హరీష్ నిర్మిస్తున్న ఈ సినిమాలో టాలెంటెడ్ హీరోయిన్లు ఐశ్వర్య రాజేష్, రీతూ వర్మ నటిస్తున్నారు. పూర్తి ఫ్యామిలీ ఎంటర్‌టైనర్‌గా రాబోతున్న ఈ సినిమా ప్రస్తుతం షూటింగ్ జరుపుకుంటోంది. ఈ నేపథ్యంలో క్రిస్మస్ కానుకగా ఈ సినిమా ఫస్ట్ లుక్ పోస్టర్‌ను రిలీజ్ చేసింది చిత్ర యూనిట్. ఇందులో క్లాస్ లుక్‌లో దర్శనమిచ్చిన నాని.. ఒక చేత్తో భోజనం చేస్తూ.. మరో చేతితో కత్తిని పట్టుకుని ఉన్నాడు. తొలిసారి అతడి చేతితో కత్తి కనిపించడంతో అంతా షాక్‌ అవుతున్నారు.

ఈ ఫస్ట్ లుక్ పోస్టర్‌లోనే 'టక్ జగదీష్' విడుదలపై క్లారిటీ ఇచ్చింది చిత్ర యూనిట్. ఈ మేరకు దాని మీద '2021 ఏప్రిల్‌లో బాక్సాఫీస్‌ను స్టక్ చేయబోతున్నాం' అని రాసుకొచ్చారు. దీంతో నాని అభిమానులు ఖుషీ అవుతున్నారు. ఇక, ఈ సినిమాతో పాటే నేచురల్ స్టార్ వివేక్ ఆత్రేయ దర్శకత్వంలో 'అంటే.. సుందరానికీ' అనే సినిమాతో పాటు 'ట్యాక్సీవాలా' ఫేమ్‌ రాహుల్‌ సాంకృత్యన్‌ దర్శకత్వంలో 'శ్యామ్ సింగరాయ్' అనే చిత్రాల్లో నటిస్తున్నాడు. ఇప్పటికే ఈ రెండు చిత్రాలు కూడా అధికారికంగా ప్రారంభం అయిపోయాయి.