మెగా అనే పదం చాలా ప్రెస్టిజియస్, పెద్దనాన్న కష్టార్జితం (నిహారిక ఇంటర్వ్యూ)

'ఒక మనసు' ప్యూర్‌ లవ్‌ స్టోరీ. ఇప్పటి వరకు తెలుగులో లవ్‌ స్టోరీస్‌ అంటే ‘మరోచరిత్ర', ‘గీతాంజలి' చిత్రాలు గురించి ఎక్కువగా చెబుతుంటారు. ఈ రెండు సినిమాలు తర్వాత ‘ఒకమనసు' సినిమాను గుర్తుపెట్టుకుంటారు అని నిహారిక అన్నారు.

ఒక మనసు' చిత్రం 80 శాతం సంధ్య, సూర్యలపై నడుస్తుంది. సంధ్య అనే పాత్ర చాలా ప్రభావం చూపుతుంది. అమ్మాయంటే ఇలా ఉండాలనేలా ఉంటుంది. ఈ సినిమా లవ్‌స్టోరీ కదా అని ఎక్కడా ఎబ్బెట్టుగా ఉండదు అని నిహారిక తెలిపారు.

నేను సినిమాల్లోకి వస్తున్నానని తెలియగానే అభిమానులు వచ్చి నాన్నను కలిసి మాట్లాడారు. నాన్న కూడా వారితో నన్ను మాట్లాడించారు. ఇంత కాలం పెద్దనాన్నను అన్నయ్యగా భావించిన అభిమానులకు ఆయన కూతురుగా నేను ఇండస్ట్రీలోకి వస్తున్నానంటే వారి సొంత అమ్మాయిలా ఫీలయ్యారు అని నిహారిక తెలిపారు.

కథను నేను ఏలాంటి అంచనాలు, ఆలోచనలు లేకుండా విన్నాను. రామరాజుగారు చెప్పిన కథ, అందులో హీరోయిన్‌ సంధ్య క్యారెక్టరైజేషన్‌ బాగా నచ్చింది. దాంతో సినిమా చేయడానికి వెంటనే ఒప్పుకున్నాను. అంతే తప్ప ఆయన మొదటి సినిమా ఎంటి, ఆయన కమర్షియల్‌ డైరెక్టరా అని ఆలోచించలేదు అని నిహారిక తెలిపారు.

మా పెద్దనాన్నగారికి ఉన్న ఇమేజ్‌ వల్ల నా మొదటి సినిమా గురించి అంతా మాట్లాడుకుంటున్నారు. నా రెండో సినిమాకు ఇంత అటెన్షన్‌ ఉండదు. అలాగే అభిమానులు కూడా మొదటి సినిమా ఎలా చేశానని చూస్తారు. నేను సరిగా యాక్టింగ్‌ చేయకపోతే నా రెండో సినిమాకు రారు. నా టాలెంట్‌తోనే నేను వారిని థియేటర్స్‌కు రప్పించాల్సి ఉంటుంది. అందుకే టాలెంటును నమ్ముకుని ఇటు వైపు వచ్చాను అన్నారు.

నేను గ్లామర్‌ పాత్రలు చేయడానికి ఇష్టపడటం లేదు. అలాంటి పాత్రలు చేయడానికి నేను ఆసక్తిగా కూడా లేను. నేను కథలను ఎంపిక చేసుకునేటప్పుడు నాన్నగారిని, మెగా అభిమానులను దృష్టిలో పెట్టుకునే ఎంపిక చేసుకుంటాను. కుటుంబ సభ్యులను, అభిమానులను ఇబ్బంది పెట్టే పాత్రలను మాత్రం చేయను. అన్నారు.

మెగా వారసురాలు అనే బాధ్యతను నేను అడగకపోయినా నాకు అభిమానులు ఇచ్చారు. అయితే మెగా అనే పదం చాలా ప్రెస్టిజియస్‌. పెద్దనాన్న చిరంజీవిగారి కష్టార్జితం. దాని కోసం ఆయనెంత కష్టపడ్డారో మాకు తెలుసు అన్నారు.

హీరోయిన్‌గా రోల్‌ మోడల్‌ ఎవరు అనే ప్రశ్నకు నా దగ్గర సమాధానం లేదు. హీరో అయినా, హీరోయిన్‌ అంటే నటించాలి. అంటే కాబట్టి నటన పరంగా నాకు రోల్‌మోడల్‌ అంటే పెద్ద నాన్న చిరంజీవిగారే అని నిహారిక తెలిపారు.

రామరాజుగారు చాలా ఇష్టంతో రాసుకున్న కథ ‘ఒక మనసు'. ఆయన డైరెక్షన్‌లో చేయడం చాలా కంఫర్ట్‌ బుల్‌గా అనిపించింది. అలాగే నాగశౌర్య మంచి కో స్టార్‌. కొన్ని సన్నివేశాల్లో నటన పరంగా బాగా సపోర్ట్‌ చేశాడు అని నిహారిక తెలిపారు.