సంచలన రీమేక్‌లో నిఖిల్!.. కేశవకు సీఎం కేసీఆర్, ఎంపీ కవిత ప్రశంస..

కిరిక్ పార్టీలో ..

కన్నడలో ఇటీవల సంచలన విజయం సాధించిన కిరిక్ పార్టీలో నిఖిల్ నటించడానికి సమ్మతి తెలిపినట్టు తెలిసింది. ఈ చిత్రానికి ప్రముఖ డ్యాన్స్ మాస్టర్ రాజు సుందరం, నిర్మాత అనిల్ సుంకర నిర్మాతగా వ్యవహరిస్తున్నారు. రొమాంటిక్, కామెడీ చిత్రంగా రూపొందిన కిరిక్ పార్టీ కన్నడంలో భారీ విజయంతోపాటు రికార్డు స్థాయి కలెక్షన్లను రాబట్టి ట్రేడ్ అనలిస్టును ఆశ్చార్యానికి గురిచేసింది. కన్నడ చిత్రానికి రిషబ్ శెట్టి దర్శకత్వం వహించగా రక్షిత్ శెట్టి, రష్మిక మందన్న, సంయుక్తా హెగ్డే, అరవింద్ అయ్యర్, ధనుంజయ్ రంజన్, ప్రమోద్ శెట్టి ప్రధాన పాత్రల్లో కనిపించారు.

కార్తీకేయ సీక్వెల్‌లో..

కేశవ తర్వాత కార్తీకేయ సినిమాకు సీక్వెల్‌లో నటించాలని నిఖిల్ ప్లాన్ చేసుకొన్నాడు. చందు మొండేటి దర్శకత్వం వహించే ఈ చిత్రాన్ని దిల్ రాజు నిర్మించడానికి సిద్ధంగా ఉన్నాడు. అయితే ఈ సినిమాపై నిర్మాత దిల్ రాజు అధికారికంగా ప్రకటన చేయకపోవడంతో కొంత ఆలస్యం జరిగింది. దిల్ రాజు సతీమణి ఆకస్మిక మరణం వల్ల ఈ చిత్ర ప్రారంభోత్సవం ఆలస్యమైనట్టు సమాచారం.

కేశవకు సీఎం కేసీఆర్ ప్రశంస

మే 19వ తేదీన రిలీజైన కేశవ చిత్రాన్ని తెలంగాణ ముఖ్యమంత్రి కేసీఆర్, ఎంపీ కవిత.. నిఖిల్ నటించిన కేశవ సినిమాను చూశారు. సినిమా విడుదలైన శుక్రవారం నాడే కేసీఆర్, కవితలకు స్పెషల్ షో వేశారని సినీ వర్గాలు పేర్కొన్నాయి. సుధీర్ వర్మ సినిమా తీసిన విధానాన్ని కేసీఆర్ మెచ్చుకున్నట్టు సమాచారం. రివేంజ్ క్రైమ్, మర్డర్ మిస్టరీ సాధారణంగా ఉన్నప్పటికి.. డైరెక్టర్ సినిమా ప్రెజెంట్ చేసిన విధానం కేసీఆర్‌కు బాగా నచ్చినట్టు చెబుతున్నారు. హీరో తన ప్రతీకారం తీర్చుకున్న విధానం తెరపై సుధీర్ వర్మ అద్భుతంగా తెరకెక్కించాడని కేసీఆర్, కవిత ప్రశంసించారట.

సీఎంకు, కవితకు నిఖిల్ కృతజ్ఞతలు

సీఎం కేసీఆర్, కవిత.. కేశవ సినిమా చూడడం పట్ల నిఖిల్ తన సంతోషాన్ని ట్విట్టర్‌లో వ్యక్తం చేశాడు. ఈ సందర్భంగా వారికి కృతజ్ఞతలు తెలిపాడు. కేశవ సినిమా కోసం టైం కేటాయించి, సినిమాను అభినందించిన గౌరవీనీయులైన సీఎం కేసీఆర్, ఎంపీ కవిత గార్లకు కృతజ్ఞతలు చెబుతున్నానంటూ ట్వీట్ చేశాడు నిఖిల్. వారు ఈ సినిమాను చూడటం తనకు గొప్ప అదృష్టంగా భావిస్తాను అని నిఖిల్ ట్విట్టర్‌లో పేర్కొన్నాడు.