గౌతమితో తెగదెంపులు: ఆటాడుతున్నారంటూ కమల్ హాసన్ మండిపాటు

చెన్నై: గౌతమి తనతో తెగదెంపులు చేసుకున్న విషయంపై తాను ఏ విధమైన ప్రకటన కూడా చేయలేదని తమిళ నటుడు కమల్ హాసన్ స్పష్టం చేశారు. తాను విడుదల చేసినట్లు ఓ ప్రకటన మీడియాలో రావడంపై ఆయన గుర్రుగా ఉన్నారు. తాను విడుదల చేసినట్లు చెబుతున్న ప్రకటనను ప్రచారం చేయడం అనైతికమని అన్నారు.

దాదాపు 13 ఏళ్ల బంధాన్ని గౌతమి తెగదెంపులు చేసుకోవడంపై కమల్ హాసన్ ప్రతిస్పందించినట్లు ఓ ప్రకటన సోషల్ మీడియాలో సందడి చేస్తోంది. ఈ సమయంలో తాను ఏ విధమైన ప్రకటన కూడా ఇవ్వడం లేదని ఆయన చెప్పారు.

తన పేరు మీద ఎవరో ప్రకటన చేసి 'ఆటలాడుతున్నార'ని ఆయన మండిపడుతున్నారు. తన పేరు మీద ప్రకటన జారీ చేసి ఆటలాడుకోవడం గౌరవప్రదమైన విషయం కాదని ఆయన అన్నారు. ఈ మేరకు ఆయన తమిళ భాషలో ట్వీట్ చేశారు.

తన పేరు మీద ఎవరో ప్రకటనలు ఇచ్చారని, ఇది అనైతికమని, దానిపై తాను ఏమీ వ్యాఖ్యానించదలుచుకోలేదని ఆయన తమిళంలో ట్వీట్ చేశారు.