ఇంకా అలవాటు పడలేదు.. నా భర్త అలాంటోడు కాదు.. ప్రియమణి

మా మధ్య ఏదో గాఢమైన బంధం

మాది లవ్ ఎట్ ఫస్ట్ సైట్ కాదు. తొలిసారి సెలబ్రిటీ క్రికెట్ లీగ్ సందర్భంగా కలుసుకొన్నాం. ఆ తర్వాత తరచుగా కలుసుకోవడం జరిగింది. కొన్ని రోజుల తర్వాత మా మధ్య ఏదో గాఢమైన బంధం ఉంది అనే విషయం అర్థమైంది. పెళ్లి తర్వాత కూడా స్నేహితుల మాదిరిగానే ఉన్నాం. నన్ను చిన్నపిల్లలా చూసుకోవడం నాకు చాలా నచ్చింది.

అందుకే పెళ్లి నిరాడంబరంగా

మా పెళ్లికి ముందు మా ఇంట్లో విషాదం చోటుచేసుకొన్నది. మా బంధువు ఒకరు మరణించారు. అందుకే పెళ్లి చాలా నిరాడంబరంగా జరిగింది. అందుకే ఎక్కువ మందిని పిలువలేదు. త్వరలోనే నా సన్నిహితులను పిలిచి డిన్నర్ ఏర్పాటు చేస్తాం.

వైవాహిక జీవితానికి

మా మధ్య స్నేహం, చొరవ ఉన్నప్పటికీ వైవాహిక జీవితానికి మేము ఇంకా అలవాటు పడలేదు. పెళ్లి జరిగిన మూడో రోజే షూటింగ్‌కు వెళ్లాల్సి వచ్చింది. ఆ విషయంలో ముస్తాఫా నన్ను బాగా అర్థం చేసుకొన్నాడు. పెళ్లి తర్వాత ఇంట్లో ఉండాలని చెప్పే వ్యక్తి కాదు నా భర్త. డేటింగ్ చేసేటప్పటి నుంచి నిజాయితీగానే ఉన్నాం.

జీవితంలో నాకు భర్త ముఖ్యం

జీవితంలో నాకు భర్త, అతని కుటుంబ సభ్యులు చాలా ముఖ్యం. నా భర్త, కుటుంబం గురించి ఎవరేమీ అనుకొన్నా పట్టించుకొను. నా భర్త మద్దతు, సహకారం ఉన్నందున పెళ్లయ్యాక కూడా సినిమాలు చేస్తాను

నెటిజన్లు చాలా కామెంట్స్‌

నా భర్త ముస్లీం మతానికి చెందినవాడు. అతడిని వివాహం చేసుకున్నందుకు నెటిజన్లు చాలా కామెంట్స్‌ చేశారు. ముస్తాఫా గురించి, మా ప్రేమ గురించి ముందుగానే మీడియాకు ఎందుకు చెప్పానంటే.. నా సంతోషాన్ని అభిమానులతో పంచుకోవాలనుకొన్నాను. అంతేకానీ ముస్తఫాని పెళ్లి చేసుకోవాలా? వద్దా? అని అనుమతి తీసుకోవడానికి కాదు అని ప్రియమణి అన్నారు.