నాన్న మెగాస్టార్ అని నాకు తెలియదు, తలకు గాయమై కుట్లుపడ్డాయ్: రామ్ చరణ్

మెగాస్టార్ అనే విషయం తెలీదు

‘‘నాకు పది పదిహేనేళ్లు వచ్చేవరకూ మా నాన్న మెగాస్టార్ అనే విషయం తెలీదు. తెలియనిచ్చేవారు కాదు. లో ప్రొఫైల్ లో మమ్మల్ని పెంచారు. సినిమా విషయాలు మా వరకు వచ్చేవి కావు. నాకు పదేళ్ల వయసున్నపుడు నాన్న స్కేటింగ్ షూస్ కొనిచ్చారు. అప్పటి నా ఆనందాన్ని మాటల్లో వర్ణించలేను.

నుదుటికి గాయమైంది

అవి కట్టుకుని ఇళ్లంతా తిరిగేశాను. అయితే అప్పటి వరకూ వాటిని వాడి ఉండక పోవటం తో కొత్తలో ఒకసారి జారి కింద పడ్డాను. నుదుటికి గాయమై నాలుగు కుట్లు కూడా పడ్డాయి. ఐతే స్కేటింగ్ షూస్ నా దగ్గరున్నాయనే ఆనందంలో ఆ బాధ కూడా కనిపించలేదు.

లంకేశ్వరుడు

ఇక నాన్న షూటింగ్ కు తొలిసారి వెళ్లింది దాసరి నారాయణరావు గారు దర్శకత్వం వహించిన ‘లంకేశ్వరుడు' సినిమాకే. ఆ సినిమాలో నాన్న వెంట ఎప్పుడూ ఓ చిరుతపులి ఉంటుంది. దాన్ని చూడగానే నాకు భయం వేసింది. ఐతే నాన్న నాకు ధైర్యం చెప్పి దగ్గరకు తీసుకెళ్లి పులిని ముట్టుకొనేలా చేశారు. ఆ సంఘటన నాకెప్పటికీ గుర్తుండిపోతుంది.

మరిచిపోలేని ప్రయాణం

ఇక నాన్నతో పాటు విదేశాలకు వెళ్లిన సందర్భాల్లో మరిచిపోలేనిది ఒకటుంది. ‘అన్నయ్య' సినిమా షూటింగ్ కోసం నాన్నతో పాటు నాకు స్విట్జర్లాండ్ వెళ్లాలనిపించింది. ఐతే నాలుగు రోజుల్లో స్కూల్ మళ్లీ మొదలవబోతుండగా నాన్న బయల్దేరుతున్నారు. స్కూల్ మానేస్తానంటే నాన్న ఊరుకోరు.

కొడతారేమోనని భయపడ్డా

కానీ నాకు మాత్రం స్విట్జర్లాండ్ వెళ్లాలని బలమైన కోరిక. అందుకే అమ్మ దగ్గరికెళ్లి విషయం చెప్పాను. ఆమె నాన్నకు చెప్పింది. నాన్న పిలిచారు. కొడతారేమోనని భయపడుతూనే వెళ్లాను. ఆయన ఒక నవ్వు నవ్వి బట్టలు ప్యాక్ చేసుకోమన్నారు. నా ఆనందానికి అవధుల్లేవు. ఆ పర్యటనను ఎప్పటికీ మరిచిపోలేను'' అని చరణ్ తెలిపాడు.