హోమ్

న్యూస్

టాలీవుడ్ స్టార్ అక్కినేని నాగార్జున ప్రస్తుతం రామ్ గోపాల్ వర్మ దర్శకత్వంలో ఓ సినిమా చేస్తున్న సంగతి తెలిసిందే. 'ఆఫీసర్' పేరుతో తెరకెక్కుతున్న ఈ చిత్రంలో నాగార్జున పోలీస్ ఆఫీసర్ పాత్రలో కనిపించబోతున్నారు. ఆల్రెడీ షూటింగ్ పూర్తి చేసుకున్న ఈ చిత్రం ప్రస్తుతం పోస్టు ప్రొడక్షన్ దశలో ఉంది.

అయితే ఈ చిత్రం ఫ్రెంచి యాక్టర్ లియా నీసన్ నటించిన యాక్షన్ థ్రిల్లర్ 'టేకెన్' నుండి ఇన్స్‌స్పైర్ అయి తీస్తున్న చిత్రం అనే వార్తలు ప్రచారంలోకి వచ్చాయి. దీనిపై రామగోపాల్ వర్మ స్పందించారు. 'టేకెన్' చిత్రానికి, 'ఆఫీసర్' చిత్రానికి ఎలాంటి పోలిక ఉండదని తెలిపారు.

ఈ సినిమా ఏ సినిమాకు ఇన్స్‌స్పిరేషన్ కాదని, ఇతర ఏ సినిమా కథతో దీనికి సంబంధం ఉండదు అని తెలిపారు. ఒక పోలీస్ అధికారి, అతడి కూతురు చుట్టూ తిరిగే కథతో ఈ సినిమా సాగుతుందని, ఇప్పటి వరకు రాని ఒక సరికొత్త కథ అని రామ్ గోపాల్ వర్మ వెల్లడించారు.

ఈ చిత్రంలో మైరా సరీన్ ఫిమేల్ లీడ్‌గా నటిస్తోంది. ఆర్ కంపెనీ బేనర్లో సుధీర్ చంద్ర, రామ్ గోపాల్ వర్మ సంయుక్తంగా ఈ చిత్రాన్ని నిర్మిస్తున్నారు. మే 25వ తేదీన సినిమాను విడుదల చేసేందుకు ప్లాన్ చేస్తున్నారు.

దాదాపు 25 సంవత్సరాల తర్వాత రామ్ గోపాల్ వర్మ-నాగార్జున కాంబినేషన్లో సినిమా వస్తోంది. వర్మ సినిమా అంటేనే విభిన్నంగా ఉంటుంది. మరి 58 ఏళ్ల నాగార్జునను పోలీస్ ఆఫీసర్‌గా వర్మ తెరపై ఎలా చూపించబోతున్నారు? అనే ఆసక్తి అభిమానుల్లో ఉంది.