కసికే కసెక్కించేలా..: రౌద్రం రాజేసిన 'కడప' సాంగ్, చావు కొడుకా..

'కడప' టైటిల్ సాంగ్:

రాయలసీమ ఫ్యాక్షన్ నేపథ్యంలో తెరకెక్కిస్తున్న కడప వెబ్ సిరీస్ కు సంబంధించి దర్శకుడు రాంగోపాల్ వర్మ తాజాగా టైటిల్ సాంగ్ విడుదల చేశారు. గీత రచయిత సిరాశ్రీ రాసిన ఈ పాటలో 'కడప' అంటేనే.. కేరాఫ్ ఫ్యాక్షన్ అన్నట్లుగా లిరిక్స్ ఉన్నాయి.

'కడప' లిరిక్స్:

యమద్వారపు గడప
కడప కడప కడప కడప కడప కడప కడప
అది బలిపీటపు గడప
కడపంటే ఫ్యాక్షన్, కడపంటే యాక్షన్
కడపంటే ఓ టెన్షన్, కడపే అటెన్షన్

కడపంటే ఊరు కాదు... బాంబురా కొడకా
కడపంటే పేరు కాదు... మృత్యువురా కొడకా
కడపకెదిరి తొడగొడితే గోతిలేనే పడక
కడపను తిరగేస్తే పడక కానీ అది చావు కొడకా...!

తాజాగా విడుదల చేసిన పాటలో లిరిక్స్ ఇలా ఉండటం గమనించవచ్చు.

ఎవరిని టార్గెట్ చేశారు?:

రాయలసీమ ఫ్యాక్షన్ అంటే.. అది ఏ ఒక్కరికో పరిమితమైనది కాదు. చాలామంది రాజకీయ నాయకులకు కూడా అందులో హస్తం ఉంది. పరోక్షంగా ఇప్పటికే వైఎస్ రాజశేఖర్ రెడ్డి, పరిటాల రవి లాంటి పేర్లను టచ్ చేసిన వర్మ.. తన వెబ్ సిరీస్ లో ఎవరి నేపథ్యాన్ని టచ్ చేయబోతున్నాడన్నది ఆసక్తికరంగా మారింది.

ఇది అన్యాయమంటున్నారు:

దశాబ్దాలుగా రాయలసీమ వాసులకు తెలుగు చలన చిత్ర పరిశ్రమ ద్రోహం చేసిందనే ఒక ఆరోపణ ఉంది. కేవలం అక్కడి ఫ్యాక్షన్ అంశాలనే తెరమీద చూపిస్తూ.. అక్కడివాళ్లను మానవత్వం లేనివాళ్లుగా చూపించే ప్రయత్నం చేశారన్న విమర్శలున్నాయి.

రాయలసీమ అంటే అదేనా?

ఫ్యాక్షన్ నుంచి కాస్త పక్కకు తొంగిచూస్తే.. రాయలసీమకు అద్భుతమైన సంస్కృతి, జీవద్భాష ఉందనేది సినిమా దర్శకులకు ఎన్నడూ గుర్తు రాలేదు. ఇప్పుడు వర్మ మరో అడుగు ముందుకేసి.. ఏకంగా రాయలసీమ అంటేనే మిగతా ప్రాంతాల ప్రజలకు వెన్నులో వణుకు పుట్టించేలా అపోహలు కలిగించడానికి సిద్దమయ్యారన్న విమర్శలు ఎక్కువగా వినిపిస్తున్నాయి.

రాము.. పట్టించుకోడంతే?

ఎవరెన్ని విమర్శలు చేసినా.. రోడ్డెక్కి నిరసనలు తెలిపినా.. రాము మాత్రం యథావిధిగా వాటిని పట్టించుకునే స్థితిలో లేడు. తాను తీయాలనుకున్నాడు.. తీసి చూపిస్తాడు. నచ్చకపోతే చూడకండి అని గతంలో లాగే మరోసారి చెబుతాడు. అయితే భగ్గుమంటున్న రాయలసీమ జనం దీనిపై ఎంతదాకా వెళ్తారో చూడాలి.