ఫ్లాప్ డైరెక్టర్‌తో ధూమ్ 4.. సల్మాన్ రిజెక్ట్.. షారుక్ ఒకే..

సల్మాన్ నిరాకరణ..

సల్మాన్ ఖాన్ ప్రస్తుతం రేస్3లో నటిస్తున్నారు. ఆ చిత్రం కథ కూడా ధూమ్ 4 తరహాలో ఉంటుందట. అందుకే ఆ సినిమాను చేయడానికి నిరాకరించాడట. ఈ నేపథ్యంలో ధూమ్ 4 చిత్రంలో హీరోగా షారుఖ్ ను నిర్మాణ సంస్థ ఎంపిక చేసింది. ఈ చిత్రంలో హీరో పాత్రకు నెగిటివ్ షేడ్స్ ఎక్కువట. దాంతో ఈ పాత్రకు షారుక్ అయితే సరిపోతాడని భావించారనేది తాజా సమాచారం.

విలన్‌గా షారుక్

గతంలో బాజీగర్, డర్, డాన్, రాయిస్ చిత్రాల్లో షారుఖ్ విలన్ గా నటించారు. ఈ చిత్రాల్లో షారుక్ అద్భుతంగా నటించి సినీ విమర్శకుల ప్రశంసలు పొందడమే కాకుండా... సదరు చిత్రాలు బాక్సాఫీస్ వద్ద కనక వర్షం కురిసిన సంగతి తెలిసిందే. ఈ నేపథ్యంలో యాష్ చోప్రా ఫిలింస్.. ధూమ్ 4లో షారుఖ్ ను హీరోగా నిర్ణయించింది.

ఆదిత్య, మనీష్ కథ..

కాగా ఈ చిత్రానికి కథను యాష్ చోప్రా ఫిలింస్ అధినేత ఆదిత్య చోప్రా .... మనీష్ శర్మ అందించారు. ఈ చిత్రానికి ప్రస్తుతం స్క్రిప్ట్ వర్క్ జరుగుతోంది. అయితే ధూమ్ 3 చిత్రానికి దర్శకత్వం వహించిన విజయ్ కృష్ణ ఆచార్య ఈ చిత్రానికి దర్శకుడు అనుకొన్నారు. అయితే సాధ్యపడే అవకాశం లేదు.

దర్శకుడు మారే అవకాశం.

ప్రస్తుతం థగ్స్ ఆఫ్ హిందూస్థాన్ పనుల్లో బిజీగా ఉన్నారు. దీంతో ఈ చిత్రానికి దర్శకుడు మారే అవకాశం ఉందని సమాచారం. ఓ వేళ ఈ చిత్రానికి మనీషే దర్శకత్వం వహించే అవకాశం లేక పోలేదని బాలీవుడ్ లో ఓ వార్త హల్‌చల్ చేస్తుంది.

షారుక్‌తో మళ్లీ

మనీష్ దర్శకత్వంలో వచ్చిన ఫ్యాన్ చిత్రం బాక్సాఫీస్ వద్ద బోల్తా కొట్టింది. అయితే వారి మధ్య ఉన్న రిలేషన్ వల్ల మరో సినిమా చేయాలని అప్పట్లో అనుకొన్నారు. అయితే ఇప్పుడు ధూమ్ 4తో వారి కోరిక నిజమయ్యే అవకాశం కనిపిస్తున్నది. ఆదిత్య నిర్ణయం తీసుకొంటే ఈ చిత్రానికి మనీష్ దర్శకుడు అయ్యే అవకాశం పుష్కలంగా కనిపిస్తున్నది.