శింబు రజనీ గెటప్‌.. ఇక అంతా మంచే.. మాజీ ప్రియుడికి ప్రేమతో నయన

నేడు శింబు 32వ జన్మదినం

మన్మథుడు, తదితర చిత్రాలతో ఓ దశలో అగ్రనటుడిగా దూసుకుపోతున్న శింబూకు ఊహించిన విధంగా కెరీర్ గ్రాఫ్ దిగజారింది. నయనతార దూరం కావడం, సినిమాలు సరిగా ఆడకపోవడంతో రేసులో వెనుకబడిపోయాడు. తాజాగా అంబనవన్ అసరాధవన్ అదంగధన్ (ఏఏఏ) అనే చిత్రంలో నటిస్తున్నారు. ఈ చిత్ర యూనిట్ తో కలిసి శింబూ శుక్రవారం తన 32వ జన్మదినాన్ని జరుపుకొన్నారు.

ఏఏఏలో త్రిపాత్రాభినయంతో కసిగా..

ఏఏఏ చిత్రంలో శింబూ మూడు పాత్రలను పోషిస్తున్నారు. మూడు పాత్రల్లో ఒకటి మధుర మైఖేల్ కాగా, రెండోది అశ్విన్ థాథా. మూడో పాత్ర అత్యంత గోప్యంగా ఉంచుతున్నారు. అశ్విన్ థాథాకు సంబంధించిన ఫొటోను జన్మదినం సందర్భంగా విడుదల చేశారు. ఈ చిత్రంలో అశ్విన్ థాథా క్యారెక్టర్ దుమ్ము రేపుతుందనే అభిప్రాయాన్ని యూనిట్ సభ్యులు వ్యక్తం చేస్తున్నారు.

రజనీకాంత్ గెటప్‌లో శింబు

చాలా కాలంగా సరైన హిట్ లేకుండా డీలా పడిన శింబూ ప్రస్తుతం ఏఏఏ సినిమాను కసితో చేస్తున్నట్టు సమాచారం. ఈ చిత్రంలోని అశ్విన్ థాథా క్యారెక్టర్ తమిళ సూపర్ స్టార్ రజనీకాంత్ గెటప్ ను పోలి ఉండటం అభిమానుల్లో ఆసక్తిని రేపుతున్నది. ఇటీవల మధుర మైఖేల్ పాత్రతో ఉన్న టీజర్ కు యూట్యూబ్ లో మంచి రెస్పాన్స్ వచ్చింది. అంబనవన్ అంటే మంచి, చెడులను చూసుకొనే వ్యక్తి అని, అసరాధవన్ అంటే ఎలాంటి పరిస్థితుల్లోనైనా చలించని వ్యక్తి అని, అదంగధన్ అంటే బెదిరిపోని వ్యక్తి అని అర్థం.

మాస్, కామెడీతో హిట్ కొట్టేందుకు

కామెడీ, మాస్ అంశాలతోపాటు పక్కా కమర్షియల్ పంథాలో సాగే ఈ చిత్రంలో శింబు సరసన తమన్నా భాటియా, శ్రియా శరన్ నటిస్తున్నారు. ఈ చిత్రాన్ని గ్లోబల్ ఇన్ఫోటైన్ మెంట్ పతాకంపై మైఖెల్ రాయప్పన్ నిర్మిస్తున్నారు. ఈ చిత్రంతో శింబూ మళ్లీ తమిళ తెరపై సంచలన విజయాన్ని అందుకొంటారనే అభిప్రాయం వ్యక్తమవుతున్నది.