సిద్దార్ధ చిత్రం గురించి మాట్లాడుతూ- ''ఇందులో నేను సాఫ్ట్వేర్ ఉద్యోగిని. ఓ సందర్భంలో ఓ అమ్మాయికి ప్రపోజ్ చేస్తా. ఆ అమ్మాయి నావైపు తిరిగి చూస్తుంది. అప్పుటి వరకూ 'ఓకే'. మళ్లీ రెండోసారి నావైపు తిరిగి చూడాల్సిన అవసరం ఆ అమ్మాయికి వస్తుంది. తర్వాత ఏం జరిగింది? అనేది ఈ సినిమా. యువతరానికే కాదు, మా అమ్మకు కూడా ఈ సినిమా నచ్చుతుంది'' అన్నారు.
అలాగే ... ''అమ్మాయిలతో మాట్లాడటానికి కూడా భయపడే కుర్రాడిని ఓ లవ్‌ గురు లవర్‌బాయ్‌గా ఎలా మార్చాడు అన్నదే కథ. ఈ సినిమా ప్రధానంగా మూడు పాత్రల మధ్య జరుగుతుంది. నేను సాఫ్ట్వేర్ ఉద్యోగిగా కనిపిస్తాను. నాకు ప్రేమ పాఠాలు చెప్పే లవ్‌గురు పాత్రను బ్రహ్మానందం చేశారు. యువతుల మనస్తత్వం ఏమిటి, వారితో ఎలా మాట్లాడాలి లాంటి విషయాలు ఆయన నాకు బోధిస్తారు. ఆ పాత్రలో ఆయన్ని తప్ప ఎవర్నీ వూహించుకోలేం. నేను కళాశాలలో చదువుకునే రోజులు గుర్తుకొచ్చాయి. అందుకే ఇందులో అప్పటి హావభావాలు కొన్ని ఈ సినిమాలో వాడాను. 'ఓ మై ఫ్రెండ్‌' తరవాత హన్సిక, నేను కలిసి నటిస్తున్న చిత్రమిది. ఆమె తన గత చిత్రాల కంటే అందంగా కనిపిస్తుంది. చాలా సన్నబడింది కూడా'' అన్నారు.
