ప్రభాస్, సూర్యలో బాక్సాఫీస్ కింగ్ ఎవరు?.. ఆగస్టు 15న రచ్చ రచ్చే!

సాహో మూవీ పరిస్థితి ఏమిటంటే

సాహో సినిమా విషయానికి వస్తే.. హైదరాబాద్ పరిసర పాంత్రాల్లో శరవేగంగా షూటింగ్ జరుపుకొంటున్నది. ప్రభాస్, ఇతర నటీనటులపై కీలక సన్నివేశాలను తెరకెక్కిస్తున్నారు. రామోజీ ఫిలిం సిటీ ప్రాంతంలో ప్రత్యేకమైన సెట్ వేసి యాక్షన్ సీన్లు చిత్రీకరిస్తున్నారు. నీల్ నితిన్ ముఖేష్, అరుణ్ విజయ్‌లపై ముఖ్యమైన సన్నివేశాలను తెరకెక్కిస్తున్నారు.

రూ. 300 కోట్లతో మూడు భాషల్లో

సుమారు రూ.300 కోట్ల భారీ బడ్జెట్‌తో రూపొందుతున్న సాహో చిత్రానికి మాది సినిమాటోగ్రఫిని అందిస్తున్నారు. బాలీవుడ్ మ్యూజిక్ త్రయం శంకర్, ఎహసాన్, లాయ్ సంగీతాన్ని అందిస్తున్నారు. తెలుగు, తమిళ, హిందీ భాషల్లో రూపొందుతున్నది. ఈ చిత్రం హిందీ హక్కులను కరణ్ జోహర్ సంస్థ ధర్మ ప్రొడక్షన్ సొంతం చేసుకొన్నట్టు సమాచారం. ఈ చిత్రాన్ని కూడా ఆగస్టు 15న రిలీజ్ చేయనున్నారు.

సూర్య సినిమా రిలీజ్ వైపు

ఇక తమిళంలో సూర్య నటిస్తున్న కాప్పన్ అనే చిత్రం చివరి షెడ్యూల్‌లో ఉంది. ప్రస్తుతం తంజావూర్ పరిసర ప్రాంతాల్లో శరవేగంగా షూటింగ్ జరుపుకొంటున్నది. ప్రముఖ నిర్మాణ సంస్థ లైకా రూపొందిస్తున్న ఈ చిత్రానికి కేవీ ఆనంద్ దర్శకుడు. ఈ చిత్రంలో ఐదు రకాల గెటప్స్‌లో సూర్య కనిపిస్తాడు.

భారీ తారాగణంతో

ప్రతిష్టాత్మకంగా రూపొందున్న కాప్పన్ చిత్రంలో మోహన్ లాల్, ఆర్య, సాయేషా, బోమన్ ఇరానీ తదితరులు నటిస్తున్నారు. హ్యారీస్ జయరాజ్ సంగీతం అందిస్తున్నారు. ఈ చిత్రాన్ని స్వాతంత్ర్య దినోత్సవం రోజున రిలీజ్ చేసేందుకు సిద్ధం చేస్తున్నారు.

బాక్సాఫీస్ వద్ద భారీ పోటీ

సాహో, కాప్పన్ సినిమాలను పరిశీలిస్తే భారీ తారాగణం, బడ్జెట్‌తో రూపొందుతున్నాయి. ఈ రెండు చిత్రాలు మూడు ప్రాంతీయ భాషల్లో రిలీజ్ కానున్నాయి. సాంకేతికంగా కూడా ఎన్నో ప్రత్యేకతలు ఉన్నాయి. దాంతో ఈ రెండు సినిమాలు బాక్సాఫీస్ వద్ద పోటి పడితే వచ్చే రెస్పాన్స్ అనూహ్యంగా ఉంటుందనే మాట వినిపిస్తున్నది.