అఖిల్ బర్త్ డే స్పెషల్: అక్కినేని ఫ్యాన్స్‌కి నితిన్ కానుక!

హైదరాబాద్: అక్కినేని యంగ్ హీరో అఖిల్‌ హీరోగా వివి వినాయక్ దర్శకత్వంలో ఓ సినిమా తెరకెక్కుతున్న సంగతి తెలిసిందే. రేపు(ఏప్రిల్ 8) అఖిల్ పుట్టిన రోజు. అఖిల్ పుట్టినరోజు కానుకగా ఈ చిత్ర నిర్మాత హీరో నితిన్ అభిమానులకు గిఫ్టు ఇవ్వబోతున్నాడని టాక్. ఆ గిఫ్టు మరేదో కాదు...ఈ చిత్రానికి సంబంధించిన టీజర్ అని అంటున్నారు.

టైటిల్ ఖరారు కాని ఈచిత్రాన్ని శ్రేష్ట్ మూవీస్ పతాకంపై నిఖిత రెడ్డి సమర్పణలో నితిన్ నిర్మిస్తున్నారు. ‘ప్రొడక్షన్ ఎ' గా ఈ చిత్రాన్ని నిర్మిస్తున్నారు. సాయేషా సైగల్ అనే అమ్మాయిని హీరోయిన్ గా పరిచయం చేస్తున్నారు. ఈ చిత్రంలో అఖిల్ తండ్రి పాత్రలో ప్రముఖ నటుడు రాజేంద్రప్రసాద్ నటిస్తున్నట్లు సమాచారం.

అఖిల్ మూవీ సినిమా చిత్రీకరణ ప్రస్తుతం హైదరాబాద్‌లో జోరుగా సాగుతోంది. అన్నపూర్ణా ఏడెకరాల్లో కుటుంబ సన్నివేశాలతో సహా కొన్ని కీలక ఘట్టాలను తీస్తున్నారు. వెలిగొండ శ్రీనివాస్ అందించిన ఈ చిత్ర కథకు కోన వెంకట్ - గోపీమోహన్ జంట మాటలు సమకూరుస్తున్నారు.

అఖిల్ చేస్తున్న ఈ చిత్రకథ ఒక సోషియో - ఫ్యాంటసీ అనీ, గతంలో చిరంజీవి - శ్రీదేవి జంటగా నటించిన ‘జగదేక వీరుడు - అతిలోక సుందరి'కీ దీనికీ పోలికలున్నాయనే వార్తలు ప్రచారంలోకి వచ్చాయి. అయితే వార్తల్లో నిజం లేదని క్లారిటీ ఇచ్చారు అఖిల్. వివి వినాయక్ మార్కు కమర్షియల్ ఎంటర్టెనర్ గా ఈ చిత్రం ఉండబోతోంది.