తారల క్రికెట్ వేడుక, అదరగొట్టిన హీరోయిన్లు(ఫోటోలు)

టీఎస్ఆర్ క్రిసెంట్ క్రికెట్ కప్

గత రెండేళ్లుగా క్రీసెంట్ క్రికెట్ కప్ పోటీలు నిర్వహిస్తున్న కె.ఎం. డి.ఎస్.షఫీతో ఈసారి సుబ్బిరామిరెడ్డి కలసి ఈ పోటీలను టాలీవుడ్, బాలీవుడ్ స్టార్స్‌తో వైజాగ్‌లో నిర్వహించనున్నారు. దీనికి సంబంధించిన పరిచయ కార్యక్రమం హైదరాబాద్‌లో జరిగింది.

కప్ ఆవిష్కరణ

ఈ సందర్భంగా క్రికెట్ పోటీలో విజేతలుగా నిలిచిన వారికి అందించబోయే క్రికెట్ కప్‌ను గంటా శ్రీనివాసరావు ఆవిష్కరించారు.

ఉద్దేశ్యం మంచిదే

ఓ మంచి కార్యక్రమంకోసం షఫీ ఈ పోటీలను గత రెండేళ్లనుండి నిర్వహిస్తున్నారని, వైజాగ్ యువతకు క్రీడలపై మరింత అవగాహన కల్పించాలని ఈ కార్యక్రమం టిఎస్‌ఆర్ వైజాగ్ యూత్ వెల్ఫేర్ అసోసియేషన్ ఆధ్వర్యంలో నిర్వహించనున్నామని, సినీ తారల సందడితో స్టేడియం కలర్‌ఫుల్‌గా ఉండనుందని, అదే విధంగా వైజాగ్‌లో ఉన్న వెయ్యి యువజన సంఘాలకు క్రికెట్ కిట్‌లు అందించే ప్రయత్నం చేస్తున్నామని ఆయన వివరించారు.

సేవా మార్గం

ఈ పోటీలతో వచ్చిన లాభాన్ని వంద మంది మహిళలకు కుట్టుమిషన్ల రూపంలో, వృద్ధులకు డబ్బు రూపంలో అందించామని, గత ఏడాది దాదాపు 6800 మంది రక్తదానం చేశారని, ఈ ఏడాది సుబ్బిరామిరెడ్డితో కలసి ఈ పోటీ నిర్వహిస్తున్నందుకు సంతోషంగా వుందని, ట్రస్ట్ చైర్మన్ షఫీ తెలిపారు.

బాలీవుడ్ నటుడు సునీల్ శెట్టి

ఓ మంచి సేవా కార్యక్రమాలకోసం ఈ ఆటలు ఆడుతున్నామని, ఇది అందరికీ ఆదర్శంగా నిలవాలని, ఈసారి అందమైన వైజాగ్ తీరంలో ఆడుతున్నందుకు ఆనందంగా వుందని బాలీవుడ్ కెప్టెన్ సునీల్‌శెట్టి తెలిపారు.

శ్రీకాంత్

పేదలకు, మహిళలకు సంక్షేమ కార్యక్రమాల నిమిత్తం తాము ఈ పోటీల్లో పాల్గొంటున్నామని, అందరి ప్రోత్సాహం తమకుంటుందని టాలీవుడ్ కెప్టెన్ శ్రీకాంత్ అన్నారు.

సినీ స్టార్స్

ఈ కార్యక్రమంలో కథానాయికలు అక్ష, హంసానందిని, ఛార్మీ, కామ్నాజఠ్మలానీ, మధుశాలిని ప్రదర్శించిన నృత్యాలు ఆకట్టుకున్నాయి. నాగార్జున, రానా, తరుణ్, నిఖిల్, మంచు లక్ష్మి, గుత్తా జ్వాల, స్నేహ ఉల్లాల్, సంజన, ఉష, నిఖిత, చాముండేశ్వరినాథ్, అవంతి శ్రీనివాసరావుతదితరులు పాల్గొన్నారు.

వివాదం

కాగా...సమైక్యాంధ్రకు మద్దతుగా ఈ నెల 24న వైజాగ్‌లో భారత్-వెస్టిండీస్ మధ్య జరిగే వన్డే మ్యాచ్ రద్దు చేయాలని కోరుతూ బీసీసీఐకి లేఖ రాసిన రాష్ట్రమంత్రి గంటా శ్రీనివాసరావు, 21న జరిగే టీఎస్ఆర్ క్రిసెంట్ కప్ కు మద్దతుగా నిలవడం, నటుడు నాగార్జునతో కలిసి క్రికెట్ ట్రోపీని ఆవిష్కరించడం వివాదాస్పదం అయింది.