Adipurush Teaser: ఆదిపురుష్ టీమ్‌కు మరో షాక్.. రిలీజ్‌ను ఆపేస్తామంటూ ప్రకటన

ఆదిపురుష్ టీజర్‌పై అసంతృప్తి

ప్రభాస్ హీరోగా ఓం రౌత్ తెరకెక్కిస్తోన్న 'ఆదిపురుష్' నుంచి ఇటీవలే టీజర్ విడుదలైన విషయం తెలిసిందే. ఇందులో శ్రీరాముడు, హనుమంతుడు, రావణాసురులను చూపించిన తీరుపై విమర్శలు వెల్లువెత్తుతోన్నాయి. ఇవన్నీ హిందూ మతాన్ని అపహాస్యం చేసేలా ఉన్నాయని అభ్యంతరాలు వస్తున్నాయి. దీంతో సినిమాను బ్యాన్ చేయాలని డిమాండ్లు మొదలయ్యాయి.

విశ్వ హిందూ పరిషత్ స్పందన

'ఆదిపురుష్' మూవీ టీజర్‌పై ఇప్పటికే చాలా హిందూ సంస్థలు అభ్యంతరాలు వ్యక్తం చేసిన సంగతి విధితమే. ఈ క్రమంలోనే ఇప్పుడు ఈ వివాదంలో 'విశ్వ హిందూ పరిషత్' (VHP) కూడా స్పందించింది. ఈ మేరకు 'ఆదిపురుష్' టీజర్‌లో సన్నివేశాలపై అభ్యంతరాలను వ్యక్తం చేస్తూ ఆ సంస్థ సంభాల్ యూనిట్ ప్రచార ప్రముఖ్ అజయ్ శర్మ ప్రకటన వదిలారు.

విలువలు అపహాస్యం చేశారని

స్టార్ హీరో ప్రభాస్ నటిస్తోన్న 'ఆదిపురుష్' టీజర్‌పై విశ్వ హిందూ పరిషత్ సంభాల్ యూనిట్ ప్రచార ప్రముఖ్ అజయ్ శర్మ స్పందిస్తూ.. 'ఈ టీజర్‌లో శ్రీరాముడు, హనుమంతుడు, రావణాసురులను చూపించిన తీరు హిందూ మత విశ్వాసాలను అపహాస్యం చేసే విధంగా ఉంది. దీన్ని హిందూ సమాజం ఎట్టి పరిస్థితుల్లోనూ సహించదు' అంటూ ఆయన వెల్లడించారు.

సెన్సార్ బోర్డు రద్దు చేయాలని

రామాయంణం నేపథ్యంతో రూపొందుతోన్న 'ఆదిపురుష్' మూవీ వివాదం గురించి మాట్లాడుతూ సెన్సార్ బోర్డు తీరును కూడా తప్పుబట్టారు. 'సెంట్రల్ బోర్డ్ ఆఫ్ ఫిల్మ్ సర్టిఫికేషన్ (సెన్సార్ బోర్డు) ఏకపక్షంగా, బాధ్యతారాహిత్యంగా వ్యవహరిస్తోంది. ప్రభుత్వం దీనిపై చర్యలు తీసుకుని వెంటనే ఈ బోర్డును రద్దు చేయాలి' అంటూ ఆయన మరో కొత్త డిమాండ్‌ను చేశారు.

సినిమాను ఆపేస్తామని ప్రకటన

ఇక, ఈ వివాదంపై అజయ్ శర్మ ఘాటుగానే స్పందిచడంతో పాటు మరో డిమాండ్‌ను కూడా ఉంచారు. 'ఆదిపురుష్ మూవీలో ఉన్న అభ్యంతరకర సన్నివేశాలను వెంటనే తొలగించకపోతే.. విశ్వ హిందూ పరిషత్ చర్యలు తీసుకుంటుంది. దీన్ని ఎట్టి పరిస్థితుల్లోనూ థియేటర్లలో ఆడకుండా అడ్డుకుంటుంది' అంటూ చెప్పారు. ఆయన ప్రకటనను కొన్ని హిందూ సంస్థలు సపోర్ట్ చేశాయి.

ఆదిపురుష్‌లో ఎవరెవరున్నారు

బాలీవుడ్ డైరెక్టర్ ఓం రౌత్ డైరెక్షన్‌లో ప్రభాస్ నటిస్తోన్న చిత్రమే 'ఆదిపురుష్'. ఇందులో రెబెల్ స్టార్ రాముడిగా.. సైఫ్ అలీ ఖాన్ రావణుడిగానూ నటిస్తున్నారు. కృతి సనన్ సీతగా, సన్నీ సింగ్ లక్ష్మణుడి పాత్రను, దేవదుత్తా హనుమంతుడి పాత్రను చేస్తున్నాడు. ఈ సినిమాను టీ సిరీస్ బ్యానర్‌పై భూషణ్ కుమార్, కృష్ణ కుమార్, ప్రసాద్ సుతార్, రాజేష్ నాయర్‌లు నిర్మిస్తున్నారు.