Unstoppable 2 ప్రభాస్ ఫ్యాన్స్ కు గుడ్ న్యూస్.. బాలకృష్ణతో బాహుబలి ఎపిసోడ్ ఇవాళే!

ప్రోమోలు కూడా..

నందమూరి బాలకృష్ణ అన్ స్టాపబుల్ షోలో ప్రభాస్ గోపీచంద్ పాల్గొన్న విషయం తెలిసిందే. ఇక ఈ ఎపిసోడ్ ఎప్పుడు టెలికాస్ట్ అవుతుందా అని ఫాన్స్ అయితే ఎంతో ఆతృతగా ఎదురు చూస్తున్నారు. ఇక ఆహా నుంచి అన్ స్టాపబుల్ షోకు సంబంధించిన వరుస ప్రోమోలు కూడా విడుదలవుతున్నాయి. ఇక పార్ట్ వన్ ప్రీమియర్స్ డిసెంబర్ 30న, రెండో పార్ట్ ను జనవరి 6న విడుదల చేయనున్నట్లు ఇదివరకు ప్రకటించారు.

ఇవాళే త్వరగా..

కానీ ఇప్పుడు మొదటి పార్ట్ ను ఇవాళే అంటే డిసెంబర్ 29నే రిలీజ్ చేయనున్నట్లు తాజాగా ప్రకటించింది ఆహా. ఈ విషయాన్ని ట్విటర్ వేదికగా తెలిపింది తెలుగు ఓటీటీ సంస్థ ఆహా. "డార్లింగ్ ఫ్యాన్స్ మీ కోరిక మేరకు.. మన బాహుబలి ఎపిసోడ్ పార్ట్ 1 ఈరోజే రిలీజ్ చేస్తున్నాం. ఇవాళే త్వరగా న్యూ ఇయర్ సంబురాలను ప్రారంభించేద్దాం. రాత్రి 9 గంటలకు స్ట్రీమింగ్ కానుంది" అని ట్విటర్ వేదికగా తెలిపారు.

మహారాజును ఆహ్వానిస్తూ..

ఇక అన్ స్టాపబుల్ షోలో ప్రభాస్ పాల్గొననున్నాడని తెలిసినప్పటి నుంచి అభిమానుల్లో విపరీతమైన క్రేజ్ పెరిగింది. అందుకు అనుగుణంగానే ఎపిసోడ్ కు సంబంధించినన ఫొటోలు, గ్లింప్స్, ప్రోమో వీడియోలను సోషల్ మీడియాలో విడుదల చేశారు. వాటికి మంచి స్పందన లభించింది. మొదటి ప్రోమోలో మహారాజును ఆహ్వానిస్తున్నట్లుగా ప్రభాస్ ని షోలోకి స్వాగతం పలికాడు నందమూరి నటసింహం బాలకృష్ణ. ప్రభాస్ ఎంట్రీతో సెట్ మొత్తం ప్రేక్షకుల అరుపులు, కీకలతో మారుమోగిపోయింది.

పెళ్లి ఎప్పుడు..

సభాముఖంగా ప్రేమగా అడుగుతున్నాను.. నన్ను కూడా డార్లింగ్ అని పిలవాలని బాలయ్య అంటే సరే డార్లింగ్ సార్ అని ప్రభాస్ అన్నాడు. మొన్న శర్వానంద్ వచ్చాడు. పెళ్లెప్పుడని అడిగా.. ప్రభాస్ తర్వాత అన్నాడు అని బాలకృష్ణ అంటే.. నేను సల్మాన్ ఖాన్ తర్వాత అనాలేమో అని అందరినీ నవ్వించాడు ప్రభాస్. నిన్ను ఒక స్పాట్ లో పెట్టి గేమ్ ఆడతాను అని బాలకృష్ణ అంటే ఎలాగు పెడతారని డిసైడ్ అయి వచ్చాను సార్ అని ప్రభాస్ అన్నాడు.