Click it and Unblock the Notifications
ఏ మతానికీ వ్యతిరేకం కాదంటూ కమల్హాసన్ వివరణ
విశ్వనటుడు కమల్హాసన్ స్వీయ దర్శక నిర్మాణంలో తెరకెక్కుతున్న చిత్రం 'విశ్వరూపం'. 'ఆరో త్రీడీ' సాంకేతికతతో రూపొందించడం విశేషం. ప్రపంచంలోనే ఈ తరహా పరిజ్ఞానంతో వస్తున్న రెండో సినిమా ఇది. ఇదిలా ఉండగా బుధవారం తన పుట్టినరోజు సందర్భంగా ఆడియో విడుదల జరపాలనుకోగా.. కొన్ని కారణాలతో వాయిదా పడింది. ఈ నేపథ్యంలో అభిమానులను నిరాశపరచకూడదనే ఉద్దేశంతో ఆరో 3డీతో రూపొందించిన ట్రైలర్ను కమల్ బుధవారం విడుదల చేశారు. కార్యక్రమానికి నగరంలోని సత్యం థియేటర్ వేదికైంది.
ఈ రోజు నా పుట్టినరోజు. మదురై, చెన్నై, కోవై నగరాల్లో హెలికాప్టర్లో వెళ్లి ఆడియోను విడుదల చేసి సంక్షేమ పథకాలను పంపిణీ చేయాలని భావించా. వాతావరణం అనుకూలించని కారణంగా ప్రయాణాన్ని రద్దు చేశా. అభిమానుల కోసం ఈ ట్రైలర్ను విడుదల చేస్తున్నా. విశ్వరూపం చిత్రానికి 'యు/ఏ' సర్టిఫికేట్ లభించింది. సినిమాను ఏ మతానికీ, ఏ దేశానికి వ్యతిరేకంగా చిత్రీకరించలేదు. హాలీవుడ్లో కూడా విడుదల చేయాలని నిర్ణయించుకున్నా. మొత్తం 3 వేల ప్రింట్లల్లో జనం ముందుకు రానుంది. అందుకే పనులు మరింత పెరుగుతున్నాయి. ఆసియాలోనే తొలిసారిగా ఆరో త్రీడీ టెక్నాలజీతో తీసుకొస్తున్నాం. ఈ సాంకేతికతను రాష్ట్రంలోని 30 థియేటర్లలో ప్రవేశపెట్టనున్నట్లు చెప్పారు.
పుట్టినరోజు సందర్భంగా కమల్హాసన్కు శుభాకాంక్షలు వెల్లువెత్తాయి. కమల్ బుధవారం ఉదయం సచివాలయంలో ముఖ్యమంత్రి జయలలితను కలుసుకుని శుభాకాంక్షలు అందుకున్నారు. పలువురు నటీనటులు కూడా ప్రకటనలు విడుదల చేశారు. ఈ సందర్భంగా బాలచందర్ మాట్లాడుతూ... మారుతున్న కాలానికి తగ్గట్టు.. అత్యాధునిక సినీ ప్రపంచంలోని సాంకేతిక హంగులను ఎప్పటికప్పుడు తెలుసుకునే సత్తా కమల్కు ఉంది. తమిళ పరిశ్రమలో అతిపెద్ద స్థానం సంపాదించుకున్నారు. త్వరలో హాలీవుడ్లోనూ ప్రతిభ చాటుకుంటారు అన్నారు.
Continue with Google