చలపతిరావు జీవితం ఆ మూవీకి కథగా.. రవిబాబు పెళ్లి ప్రయత్నం.. ఈ చిత్రం పేరు ఏమిటంటే?

కొడుకు దర్శకత్వంలో చివరి సినిమా

1966 లో నటుడిగా తెలుగు సినిమా పరిశ్రమలో అడుగుపెట్టారు. స్వర్గీయ ఎన్టీఆర్ స్పూర్తితో నటుడిగా కొనసాగించారు. ఎన్టీఆర్‌ అంటే చలపతిరావుకు చెప్పలేనంత ఇష్టం. ఎన్టీఆర్‌తో సుదీర్గమైన అనుబంధం ఉంది. దాదాపు చలపతిరావు 1200 చిత్రాల్లో నటించారు. ఆయన ఇటీవల చివరిసారిగా అక్కినేని నాగార్జున నటించిన బంగార్రాజు సినిమాలో కనిపించారు. ఆయన చివరి చిత్రాన్ని కుమారుడు రవిబాబు దర్శకత్వంలో చేశారు. ఆ చిత్రం ఇంకా షూటింగ్ దశలోనే ఉంది.

ఇందుమతితో వివాహం

ఇక చలపతిరావు వ్యక్తిగత జీవితానికి వస్తే.. కెరీర్ ఉన్నతస్థాయిలో ఉండగానే.. ఇందుమతి అనే అమ్మాయిని వివాహం చేసుకొన్నారు. చలపతిరావు, ఇందుమతి దంపతులకు రవి బాబు, మాలినిదేవీ, శ్రీదేవి సంతానం కలిగారు. అయితే జీవితం ప్రశాంతంగా సాగుతుందనే సమయంలో భార్య అగ్నిప్రమాదంలో మరణించడం చలపతిరావు జీవితంలో తీవ్ర విషాదం చోటుచేసుకొన్నది.

భార్య మరణం తర్వాత

భార్య ఇందుమతి మరణించిన తర్వాత తన కన్నబిడ్డలకు అన్నీతానై వ్యవహరించారు. పిల్లల్ని ప్రాణం కంటే ఎక్కువగా చూసుకొన్నారు. మరో యువతిని పెళ్లి చేసుకొంటే.. నా బిడ్డల పరిస్థితి ఏమౌతుందనే బెంగతో ఆయన రెండో వివాహానికి దూరంగా ఉన్నారనే విషయాన్ని తన సన్నిహితులు చెబుతారు. చాలా మంది రెండో వివాహం చేసుకోవాలని సూచించినా.. దాని జోలీకి వెళ్లకపోవడం చలపతిరావు వ్యక్తిత్వానికి, ప్రేమ, అప్యాయతలకు నిదర్శనమని సినీ వర్గాలు చెప్పుకొంటాయి.

రెండో పెళ్లి ప్రస్తావనను రిజెక్ట్

తన తండ్రి చలపతిరావు ఒంటరితనాన్ని చూసి తట్టుకొలేక కుమారుడు రవిబాబు పలుమారు రెండో పెళ్లి ప్రస్తావన తీసుకొచ్చారు. అయితే తన కుమారుడి కోరికను సున్నితంగా తిరస్కరించారు. అయినా పలుమార్లు నాన్నకు పెళ్లి చేయాలని ప్రయత్నాన్ని చాలాకాలంపాటు కొనసాగించారు. అయితే తండ్రికి పెళ్లి చేయాలనే కోరికను మాత్రం రవిబాబు తీర్చుకోలేకపోయాడు. అయితే తండ్రి వదిలే తుదిశ్వాస వరకు రవిబాబు ఆయన బాగోగులు చూసుకొంటూ ఉండటం విశేషంగా చెప్పుకోవాలి.

చలపతి, రవిబాబు కథను ఈవీవీ దర్శకత్వంలో

చలపతిరావు, రవిబాబు జీవిత కథను ఆధారంగా చూసుకొని.. ప్రముఖ దర్శకుడు ఈవీవీ సత్యనారాయణ ఓ చిత్రాన్ని నిర్మించారు. భార్య వియోగంతో ఒంటరైన తండ్రికి పెళ్లి చేయాలనే కొడుకు ప్రయత్నాన్ని కథగా మలిచి మా నాన్నకు పెళ్లి అనే సినిమాను రూపొందించారు. 1997లో వచ్చిన ఈ చిత్రంలో రెబల్ స్టార్ కృష్ణంరాజు, శ్రీకాంత్, సిమ్రాన్, అంబిక, చలపతిరావు, కోటా శ్రీనివాసరావు, ఎంఎస్ నారాయణ తదితరులు నటించారు. ఈ సినిమా ద్వారానే ఎంఎస్ నారాయణకు అత్యంత పాపులారిటీ లభించింది. ఆ సినిమా తర్వాత ఎంఎస్ నారాయణ బిజీగా మారిపోయారు. ఈ సినిమాను రోజా మూవీస్ బ్యానర్‌పై అర్జునరాజు నిర్మించారు.